Monday, April 29, 2019

റമദാന്‍,ആത്മ സം‌സ്‌കരണത്തിന്റെ കൊയ്‌തും മെതിയും

സ്വര്‍‌ഗം കൊണ്ട്‌ സന്തോഷ വാര്‍‌ത്ത അറിയിക്കപ്പെട്ട സ്വഹാബി വര്യന്മാരെ കുറിച്ച്‌ നമുക്ക്‌ അറിയാം.അവരുടെ പേരുകള്‍ പോലും ഹൃദിസ്ഥമാണ്‌.ഓരോ വിശ്വാസിയും ഈ സന്തോഷ ദായകമായ വിളം‌ബരത്തില്‍ ആഹ്‌ളാദ ചിത്തരുമാണ്‌.അല്ലാഹുവിന്റെ തൃപ്‌തിക്ക്‌ പാത്രീഭൂതരായവര്‍‌ക്ക്‌ വേണ്ടി നമുക്ക്‌ പ്രാര്‍‌ഥിക്കാം.വിശ്വാസികള്‍ വിജയം വരിച്ചിരിക്കുന്നു എന്ന പ്രഘോഷണം കൊണ്ടാണ്‌ അല്‍ മുഅ്‌മിനൂന്‍ എന്ന അധ്യായം തുടങ്ങുന്നത്.ഈ ശുഭ വാര്‍‌ത്തയും വിശ്വാസിയെ ഏറെ സന്തോഷിപ്പിക്കണം.

പ്രസ്‌തുത ഉദ്‌ഘോഷത്തെ തുടര്‍‌ന്ന്‌ വിശ്വാസിയുടെ ജീവിതത്തില്‍ കണിശമായും അനുവര്‍‌ത്തിക്കേണ്ട കാര്യങ്ങള്‍ എണ്ണിയെണ്ണി പറയുന്നു.ഭയ ഭക്തിയോടു കൂടെയുള്ള നമസ്‌കാരം,ഹരം പിടിപ്പിക്കുന്ന കെടുകാര്യങ്ങളില്‍നിന്ന് നിന്നും അകലം പാലിക്കുന്നതിലെ ശുഷ്‌കാന്തി,നിര്‍‌ബന്ധ ദാനത്തിലെ നിഷ്‌‌ഠ,ലൈം‌ഗിക സ്വകാര്യതകളിലെ ഒളിഞ്ഞും തെളിഞ്ഞും സം‌ഭവിച്ചേക്കാവുന്ന അതിര്‍  ലം‌ഘനങ്ങളില്‍ നിന്നും പൂര്‍‌ണ്ണാര്‍‌ഥത്തിലുള്ള  വിശുദ്ധി, ഉത്തരവാദിത്തങ്ങളോടുള്ള പ്രതിബദ്ധത,സമയാ സമയ നമസ്‌കാരങ്ങളുടെ പ്രാധാന്യം എല്ലാം വിവരിക്കുകയും ചെയ്യുന്നു.ഒപ്പം സ്വര്‍‌ഗം അനന്തരമെടുക്കുന്നവര്‍ പ്രസ്‌തുത സ്വഭാവ ഗുണങ്ങളാല്‍ സമ്പന്നരാണെന്ന്‌ ഓര്‍‌മ്മിപ്പിക്കുകയും ചെയ്യുന്നു.

മുസ്‌ലിം എന്നു പറയുന്നതും മുഅ്‌മിന്‍ എന്നു പറയുന്നതിലേയും സാരാംശങ്ങളില്‍ വ്യത്യാസമില്ലെന്ന്‌ അഭിപ്രായങ്ങളുണ്ടെങ്കിലും മുഅ്‌മിനിന്റെ പദവി ഉയര്‍‌ന്നതാണെന്നു പറയുന്നതില്‍ തര്‍‌ക്കങ്ങളില്ല.'അസ്‌ലംനാ' എന്നു പറയുന്നതിലേയും 'ആമന്നാ' എന്ന പ്രഖ്യാപനത്തിലേയും സാര ഭേദങ്ങള്‍ സുവിദിതമത്രെ.അന്ത്യ പ്രവാചകനിലൂടെ പൂര്‍‌ത്തീകരിക്കപ്പെട്ട വിശ്വാസ സം‌ഹിതകളെ അം‌ഗീകരിച്ചിരിക്കുന്നു എന്ന്‌ പ്രഖ്യാപിച്ചവരെയാണ്‌ മുസ്‌ലിം എന്നു പറയുന്നത്.അം‌ഗികരിച്ച ദര്‍‌ശന വിശേഷത്തെ ആത്മാര്‍‌ഥമായി നെഞ്ചേറ്റി അതി ജാഗ്രതയോടെ - സൂക്ഷ്‌മതയോടെ പ്രവര്‍‌ത്തി  പദത്തില്‍ കൊണ്ടു വരുന്നവരായിരിയ്‌ക്കും മുഅ്‌മിന്‍.

'അമന്‍' അഥവാ സുരക്ഷ എന്ന അറബി പ്രയോഗത്തിലെ ഒരു ഘടകമത്രെ മുഅ്‌മിന്‍.മുഅ്‌മിന്‍ സ്വയം സുരക്ഷിതനാണ്‌.ഭൗതികാര്‍‌ഥത്തിലൊ ആത്മീയാര്‍‌ഥത്തിലൊ ഉള്ള ഒരു വക അരക്ഷിതാവസ്ഥക്കും സുരക്ഷാ സുസ്‌ഥിരതക്കും ഭീഷണിയാകാന്‍ മുഅ്‌മിന്‍ ഉപാദിയൊ ഉപകരണമൊ ആയിരിക്കില്ല.പൊതു മുതല്‍ നശിപ്പിക്കാനും അന്യരുടെ ജീവനും സ്വത്തിനും നാശം വിതയ്‌ക്കാനും മുഅ്‌മിനിന്‌ സാധ്യമല്ല.

സമൂഹത്തിലെ ഏറ്റവും ചെറിയ ഘടകമായ കുടും‌ബം മുതല്‍ ഈ സുരക്ഷിത വൃത്തത്തിന്‌ പ്രാധാന്യമുണ്ട്‌. കുടും‌ബത്തിലെ മാതാ പിതാക്കള്‍‌ക്കും, സഹോദരങ്ങള്‍ക്കും,ഇണ തുണകള്‍‌ക്കും, സന്താനങ്ങള്‍‌ക്കും സുരക്ഷിതത്തം ഉറപ്പാക്കാന്‍ മുഅ്‌മിനിനു സാധിച്ചിരിക്കണം. അതു പോലെ അയല്‍ വാസികള്‍‌ക്ക്‌,സഹ വാസികള്‍‌ക്ക്‌,സഹ പ്രവര്‍‌ത്തകര്‍‌ക്ക്‌,സമൂഹത്തില്‍ നിരന്തരം ഇടപെടുന്നവര്‍‌ക്ക്‌ എല്ലാം ഈ ദൈവ ദാസന്‍ മുഅ്‌മിനായി അനുഭവിക്കാന്‍ സാധ്യമാകാതിരുന്നുകൂട. മാത്രമല്ല ഇതര ജന്തു ജാലങ്ങള്‍ക്ക്‌ പോലും ഈ സുരക്ഷിതത്തം അനുഭവേദ്യമാകണം. ആകാശത്തോളം പടര്‍‌ന്നു പന്തലിച്ച വൃക്ഷത്തോടുപമിച്ച ഉത്തമ വചനത്തെ ഉള്‍‌കൊണ്ടവര്‍ മറ്റുള്ളവരുടെ പ്രതീക്ഷയാകാതിരിക്കാന്‍ ന്യായമില്ല.

സഹജര്‍‌ക്ക്‌, സഹവാസികള്‍‌ക്ക്‌,മാതാ പിതാക്കള്‍‌ക്ക്‌, സന്താനങ്ങള്‍‌ക്ക്‌, എന്നല്ല സ്വന്തം സഹധര്‍‌മ്മിണിക്ക്‌ പോലും തോന്നാന്‍ സാധ്യതയുള്ള വല്ലായ്‌മ അസ്വസ്ഥത അരക്ഷിത ബോധം എന്നിവ ഏറെ ഗൗരവമുള്ളതാണ്‌.ഏതൊരുവനെ കുറിച്ച്‌ സ്വന്തക്കാരിലൊ അല്ലാത്തവരിലൊ മുളയ്‌ക്കുന്ന ഭയാശങ്കകള്‍ക്ക്‌ കാരണക്കാരനായവന്‍ മുഅ്‌മിന്‍ എന്ന സ്ഥാനത്തിന്‌ യോഗ്യനായിരിയ്‌ക്കില്ല.

മുഅ്‌മിന്‍ എന്ന വിശേഷണത്തിനും അതു വഴി വിജയം വരിച്ചു എന്നു പ്രഖ്യാപിക്കുന്നവരുടേയും സ്വഭാവ വിശേഷങ്ങള്‍ എണ്ണിപ്പറഞ്ഞതില്‍ ഓരോന്നും നമുക്ക്‌ പരിശോധിക്കാം.

അല്ലാഹു അവന്റെ ദാസന്മാരുമായി കൂടിക്കാഴ്‌ചക്ക്‌ അനുവദിച്ച നിര്‍‌ണ്ണിതമായ സമയമാണെന്ന ബോധത്തോടെയായിരിക്കണം നമസ്‌കാരത്തിലേയ്‌ക്ക്‌ പ്രവേശിക്കേണ്ടത്.പൂര്‍‌ണ്ണമായും അല്ലാഹുവിന്റെ നിരീക്ഷണ വലയത്തിലാണെന്ന വിശ്വാസത്തോടെ മുസ്വല്ലയില്‍ നില്‍‌ക്കുമ്പോള്‍ മാത്രമേ ഭയ ഭക്തിയോടു കൂടിയ പ്രാര്‍‌ഥന നിര്‍‌വഹിക്കാന്‍ സാധിക്കുകയുള്ളൂ.

എല്ലാ ഹരം പിടിപ്പിക്കുന്നതിനേയും സൂചിപ്പിക്കുന്ന പദമാണ്‌ ലഗ്‌വ്‌. ഭ്രാന്തമായ സം‌ഗീതവും ഈ ഗണത്തില്‍ പെടും.നിത്യ ജിവിതത്തിലെ വളരെ പ്രാധാന്യമുള്ള കാര്യങ്ങള്‍‌ പോലും വിസ്‌മരിപ്പിച്ചു കളയുന്ന സോഷ്യല്‍ മീഡിയാ ഭ്രാന്തിനേയും ലഗ്‌വിന്റെ പരിതിയില്‍ കാണാവുന്നതാണ്‌.അതിനാല്‍ സകല വിധ ലഗ്‌വില്‍ നിന്നും മുക്തനാകാന്‍ വിശ്വാസി ബാധ്യസ്ഥനാണ്‌.

നിര്‍‌ബന്ധമാക്കപ്പെട്ട ദാനം,സകാത്തിനര്‍‌ഹരായവരുടെ അവകാശമാണ്‌. അല്ലാതെ ദാതാവിന്റെ ഔദാര്യമല്ല.കണിശമായ കണക്കെടുപ്പിനു ശേഷം നീക്കിവെക്കാന്‍ നിര്‍‌ബന്ധിതമായ വിഹിതം ഏറ്റവും ഉചിതമായ രീതിയില്‍ അനുഷ്‌ഠിച്ചു എന്ന്‌ ഉറപ്പു വരുത്താന്‍ ഓരോ വിശ്വാസിയും ബാധ്യസ്ഥനാണ്‌.എങ്കില്‍ മാത്രമേ ഈ അനുഷ്‌ഠാനം പൂര്‍‌ത്തീകരിച്ചവരില്‍ ഉള്‍‌പ്പെടുകയുള്ളൂ.

ലൈം‌ഗിക വിശുദ്ധി എന്നു പറയുമ്പോള്‍ കേവലം പരപുരുഷ പരസ്‌ത്രീ ബന്ധമില്ലാത്ത എന്നതിനെക്കാള്‍ വിശാലമായ അര്‍‌ഥ വ്യാപ്‌തി ഈ പ്രയോഗത്തിനുണ്ട്‌.ആധുനിക സാങ്കേതിക സൗകര്യങ്ങള്‍ വഴി അനുവദിച്ചു കിട്ടുന്ന അസാന്മാര്‍‌ഗിക സൗകര്യങ്ങളും സന്ദര്‍‌ഭങ്ങളും ആസ്വദിക്കുന്ന പ്രവണതയുള്ളവരും ലൈം‌ഗിക വിശുദ്ധി പുലര്‍‌ത്തുന്നവരില്‍ ഉള്‍‌പ്പെടുകയില്ല.അതിനാല്‍ മ്‌ളേഛതകളിലേയ്‌ക്കുള്ള സൂചനകളെപ്പോലും കരുതിയിരിക്കാനും സൂക്ഷ്‌മത പുലര്‍‌ത്താനും വിശ്വാസിക്ക്‌ സാധിക്കണം

ഉത്തരവാദിത്തങ്ങളും കരാറുകളും പാലിക്കുന്നതില്‍ ഒരു വിട്ടു വീഴ്‌ചയും പാടില്ല.കപടന്മാരുടെ ലക്ഷണങ്ങളില്‍ എണ്ണപ്പെട്ട ഒന്നത്രെ വാഗ്‌‌ദത്ത ലം‌ഘനം.വിശ്വസിച്ചാല്‍ വഞ്ചിക്കുക, സംസാരിച്ചാല്‍ കള്ളം പറയുക, കരാര്‍ ചെയ്‌താല്‍ ലംഘിക്കുക, സംഘര്‍ഷമുണ്ടായാല്‍ സംസ്‌കാരത്തിന്റെ എല്ലാ പരിധികളും വിസ്‌മരിക്കുക തുടങ്ങിയവയാണ്‌ കപടന്മാരുടെ ലക്ഷണങ്ങളായി ഓര്‍‌മ്മിപ്പിക്കപ്പെട്ടിട്ടുള്ളത്‌.അമാനത്ത് ഇല്ലാത്തവന്ന് ഈമാനില്ല.കരാര്‍ പാലിക്കാത്തവന്ന് ദീനുമില്ല.നാലു കാര്യങ്ങള്‍ ഒരുമിച്ച്‌ മേളിച്ചവന്‍ നിസ്സം‌ശയം കപടനാകുന്നു. അവയില്‍ ഏതെങ്കിലും ഒന്ന്‌ ആരിലുണ്ടോ അവനില്‍ കാപട്യത്തിന്റെ ഒരു ലക്ഷണമുണ്ട്.

ആറാമതായി പറയുന്നത്.സമയാ സമയങ്ങളിലെ നമസ്‌കാരങ്ങളെ കുറിച്ചാണ്‌.അഥവാ 'ഇഖാമതുസ്വല' ഇത്‌ വിശ്വാസിയുടെ നിര്‍‌ബന്ധ ബാധ്യതയാണ്‌. അഥവാ സ്വയം നമസ്‌കാരം അനുഷ്‌ഠിക്കുക  എന്നതിലുപരിയാണ്‌ ഇതിലെ വിവക്ഷ. ലോകത്ത് ഏതു വ്യവസ്ഥയുള്ള ഇടങ്ങളിലും വിശ്വാസികള്‍ ഉണ്ടെങ്കില്‍ 'ഇഖാമതുസ്വല'നടക്കുന്നു എന്നതും പരമാര്‍‌ഥമത്രെ. ഇവ്വിധം അല്ലാഹുവിന്റെ ഭവനങ്ങള്‍ പൂര്‍‌ണ്ണാര്‍‌ഥത്തില്‍ സജീവമാകുമ്പോള്‍ സ്വാഭാവികമായും സര്‍‌ഗാത്മകമായും ഇഖാമതുദ്ദീന്‍ എന്ന വിഭാവനയും പൂവണിഞ്ഞേക്കും.

വിശുദ്ധ ഖുര്‍‌ആന്‍ പ്രഘോഷിക്കുന്ന യഥാര്‍‌ഥ മുഅ്‌മിന്‍ എന്ന പദവിയിലേയ്‌ക്കും അതു വഴി വിജയം പ്രാപിച്ചവരിലേയ്‌ക്കും അര്‍‌ഹത നേടാന്‍ സാധിക്കുന്ന സുവര്‍‌ണ്ണാവസരമാണ്‌ പരിശുദ്ധ ഖുര്‍‌ആന്‍ അവതീര്‍‌ണ്ണമായ റമദാന്‍. കാരണം വിശുദ്ധ ഖുര്‍‌ആനുമായുള്ള നിരന്തര ബന്ധമാണ്‌ സകല വിജയങ്ങളുടേയും ആധാരം.

വിശ്വാസിയുടെ ഹൃദയം ഒരു കോട്ടയാണ്‌.അതിലെ വെളിച്ചം വിശുദ്ധ ഖുര്‍‌ആനാണ്‌.കോട്ടയുടെ ഉരുക്ക്‌ കവാടം പടച്ച തമ്പുരാനെ കുറിച്ചുള്ള സ്‌മരണയാണ്‌.പ്രസ്‌തുത കവാടം ദുര്‍ബലപ്പെടുന്ന സാഹചര്യത്തില്‍ കോട്ടയില്‍ ഇരുള്‍ പരക്കും.ഇരുള്‍ പരന്നു കഴിഞ്ഞാല്‍ കോട്ടയുടെ പിന്‍ ഭാഗത്ത് തക്കം പാര്‍‌ത്തിരിക്കുന്ന പിശാചുക്കള്‍ കോട്ടയുടെ അകത്തേയ്‌ക്ക്‌ പ്രവേശിക്കും.ഈ പിശാചുക്കളെ കോട്ടക്കകത്ത്‌ നിന്നും ആട്ടിയകറ്റാന്‍ ഏറെ സാഹസപ്പെടേണ്ടി വരും.പ്രവാചകാധ്യാപനങ്ങളുടെ തെളിച്ചത്തില്‍ ഇമാം ഗസ്സാലി (റ)യുടെ പ്രസിദ്ധമായ ഉപമയാണിത്.

ഏതൊരു കോട്ടയുടെയും പരമ പ്രധാനമായ ഭാഗം പ്രവേശന കവാടമാണ്‌.അതിന്റെ ഭദ്രതയുടെയും സുരക്ഷയുടെയും കാര്യവും, അവിടെ ജാഗ്രതയോടെ മിഴി നട്ടിരിക്കേണ്ടതിന്റെ അനിവാര്യതയും കൂടുതല്‍ വിശദീകരിക്കേണ്ട കാര്യവുമില്ല.അതിനാല്‍ ദൈവ സ്‌മരണയാല്‍ സജീവമായ അവസ്ഥയില്‍ മാത്രമേ കോട്ടയുടെ സുരക്ഷിതത്വം സാധ്യമാകുകയുള്ളൂ.എങ്കിലേ പ്രകാശ പൂരിതമായ വര്‍‌ണ്ണാഭയാല്‍ അലങ്കൃതമായ മനോഹരമായ കോട്ട പൈശാചിക അധിനിവേശത്തിന്‌ സാധിക്കാത്ത വിധം സുരക്ഷിതമാകുകയുള്ളൂ.

പൈശാചിക അധിനിവേശത്തെ ചെറുക്കാനും ഇച്ഛാ ശക്തിയുള്ള സുശക്തമായ ഒരു സമൂഹത്തിന്റെ പുനഃസൃഷ്‌ടിക്കും കാരണമായേക്കാവുന്ന പരിശുദ്ധ റമദാനിനെ പൂര്‍‌ണ്ണാര്‍‌ഥത്തില്‍ ഉള്‍‌കൊള്ളാനുള്ള പരിശ്രമങ്ങളില്‍ ജാഗ്രത പാലിക്കാനും ശുഭ പ്രതീക്ഷകര്‍‌ക്ക്‌ സാധിക്കണം.അഥവാ ആത്മസം‌സ്‌കരണത്തിന്റെ കൊയ്‌തും മെതിയും.

പൂര്‍‌ണ്ണമായും ഹൃദയ വിശുദ്ധിയുള്ള, ജീവിതത്തിലെ അടക്ക അനക്കങ്ങളെ അടിമുടി ചിട്ടപ്പെടുത്തിയ വ്യക്തിയായിരിയ്‌ക്കും യഥാര്‍‌ഥ വിശ്വാസി എന്നു ചുരുക്കം.അതിനാല്‍ നിശ്ചയം യഥാര്‍‌ഥ വിശ്വാസികള്‍ വിജയം പ്രാപിച്ചിരിക്കുന്നു.

പ്രഭാതം മുതല്‍ പ്രദോഷം വരെ അന്നപാനീയങ്ങളും ഭോഗ സുഖങ്ങളും വെടിയുക എന്നതാണ്‌ കര്‍മ്മ ശാസ്‌ത്രപരമായ വിവക്ഷയില്‍ വ്രതം. വിശ്വാസി ദിനേന പുതുക്കിക്കൊണ്ടിരിക്കുന്ന പ്രതിജ്ഞകളെ പരീക്ഷണ വിധേയമാക്കുകയയാണ്‌ റമദാന്‍.അനുവദനീയമായ കാര്യങ്ങള്‍ പോലും ഒരു നിര്‍‌ണ്ണിത സമയത്ത്‌ നിരോധിച്ചു കൊണ്ടുള്ള കല്‍‌പന.അത്‌ ശിരസാ വഹിക്കുന്ന ആത്മാര്‍ഥയുള്ള നിഷ്‌കളങ്കനായ വിശ്വാസി.

എന്നാല്‍ ഇവ്വിധമുള്ള ഇച്ഛാശക്തിയിലൂടെ മനസ്സിനെ പാകപ്പെടുത്തുക വഴി ഗൗരവമുള്ള ഉത്തരവാദിത്തങ്ങള്‍ പലതും ഏറ്റെടുക്കാന്‍ വിശ്വാസിയെ പ്രാപ്‌തനാക്കും.കേവലമായ വിശപ്പും ദാഹവും,രാത്രിയിലെ നിദ്രയും വെടിഞ്ഞ ഇതര ആരാധനാ കര്‍മ്മങ്ങളും എന്നതിലുപരി അകവും പുറവും സംശുദ്ധമാകുന്ന സംസ്‌കരണം വഴി മാത്രമേ വ്രതാനുഷ്‌ടാനത്തിന്റെ ആത്മീയമായ സൗന്ദര്യം ആസ്വദിക്കാനകൂ.എങ്കില്‍ മാത്രമേ തഖ്‌‌വ എന്ന അതി സൂക്ഷ്‌മതയെ ആര്‍ജ്ജിച്ചെടുത്ത്‌ യഥാര്‍‌ഥ വിശ്വാസിയാകാനും വിജയം വരിച്ചവരില്‍ ഉള്‍‌പ്പെടാനും സാധിക്കുകയുള്ളൂ.

ഇസ്‌ലാം ഓണ്‍ ലൈവ്‌

Monday, April 22, 2019

പൂനിലാവും കാത്ത്,പ്രാര്‍‌ഥനയോടെ ഒരു രാജ്യം

ഒരു പര്‍‌വ്വതത്തെ വേണമെങ്കില്‍ തച്ചു തരിപ്പണമാക്കാം.ഒരു മഹാ പ്രവാഹത്തിന്റെ ഗതി പോലും മാറ്റാനായേക്കും.എന്നാല്‍ അത്രയൊന്നും എളുപ്പമല്ലത്രെ ഒരാളുടെ മുന്‍‌വിധികള്‍ മാറ്റിയെടുക്കാന്‍.യുഗ പ്രഭാവനായ ഒരു പണ്ഡിതന്റെ വാക്കുകളാണിത്.

ഒരു വിഭാഗം ജനങ്ങളോടുള്ള അസഹിഷ്‌ണുതയും ശത്രുതയും പൊതു സമൂഹത്തില്‍ വെച്ചു വേവിക്കുകയും വിളമ്പുകയും വിതരണം നടത്തുകയും എന്ന അതി ദയനീയമായ തിരഞ്ഞെടുപ്പ്‌ കാഴ്‌ചയ്‌ക്ക്‌ ഇന്ത്യാ രാജ്യം സാക്ഷ്യം വഹിച്ചിരിക്കുന്നു.ജനാധിപത്യ പ്രക്രിയകളിലൂടെ വിജയിച്ചവരും, രാജ്യം ഭരിക്കുന്നവരും, ഭരിച്ചവരും, ഉന്നത നേതൃ നിരയും ഇങ്ങനെ പട്ടാപകല്‍ വിഷം ചീറ്റുന്നുവെങ്കില്‍ അവരുടെ അണികളുടേയും അനുധാവകരുടേയും കാര്യം ഊഹിക്കാവുന്നതേയുള്ളൂ.

ഇതര വിഭാഗങ്ങളോട്‌ ഇത്രമാത്രം ശാത്രവം വെച്ചു പുലര്‍‌ത്തുന്ന ഈ സാധുക്കളെ വരിക്കാനും വണങ്ങാനും; വിവരവും വിദ്യാഭ്യാസവും ഒക്കെ ഉള്ളവരെന്നു അനുമാനിക്കുന്നവര്‍ ചെറുതല്ലാത്ത വിധം നിര നിരയായി നില്‍‌ക്കുന്നു എന്നതും ആശ്ചര്യ ജനകമത്രെ.അജ്ഞരായ ജനങ്ങളുടെ അന്ധ വിശ്വാസങ്ങളെക്കാള്‍ ഏറെ അപകടകരം വിവരമുള്ളവരെന്നു ധരിച്ചു പോരുന്നവരുടെ അന്ധതയാണെന്ന മഹാ മനീഷികളുടെ വിലയിരുത്തലുകള്‍ എത്രമാത്രം പരമാര്‍‌ഥമാണെന്ന്‌ ബോധ്യപ്പെടുകയാണ്‌.

ഒരു രാജ്യത്തിന്റെ ഭാവിയെക്കുറിച്ചും,അതിന്റെ വികസനങ്ങളെ കുറിച്ചും,ഉണര്‍‌ന്നും ഉയര്‍‌ന്നും വരാനിരിക്കുന്ന ഒരു ജനതയെ കുറിച്ചും,ഉന്നതമായ സാം‌സ്‌കാരിക വിപ്‌ളവങ്ങളെ കുറിച്ചും ഈ സം‌ഘങ്ങള്‍‌ക്ക്‌ ഒന്നും പറയാനില്ല.മറിച്ച്‌ തങ്ങളുടെ തന്നെ സമഗ്രാധിപത്യ പ്രവണതകളെ കുറിച്ചും,പരിമിതമായ ചില വമ്പന്‍ സ്രാവുകളുടെ പരിപാലനത്തെ കുറിച്ചും,വരേണ്യ വിഭാഗത്തിന്റെ മാത്രം താല്‍‌പര്യങ്ങളെ കുറിച്ചും,നിഷേധാത്മകമായ പട നീക്കങ്ങളെ കുറിച്ചും ഒക്കെ ഒച്ച വെക്കാന്‍ മാത്രമേ ഈ കുബേര ഗോപകുമാരന്മാര്‍‌ക്ക്‌ കഴിയുന്നുള്ളൂ.

ഫാഷിസ്റ്റ് ഭരണ ക്രമത്തില്‍ ഒരു വക ക്രിയേഷനുകളും സം‌ഭവിച്ചിട്ടില്ല.മുന്‍ കാലങ്ങളിലെ വിഭാവനകള്‍ സേവ്‌ ഏസ്‌ ചെയ്‌തും റി നെയിം ചെയ്‌തും സ്വന്തമാക്കിയിട്ടുണ്ട്‌.ഡോകുമന്റുകള്‍ ഇമേജുകളായി കണ്‍‌വര്‍‌ട്ട്‌ ചെയ്‌തിട്ടുണ്ട്‌.കൂടാതെ ഒഴിവാക്കപ്പെട്ട പലതും റിസൈക്കിള്‍ ബിന്നില്‍ നിന്നും റി സ്റ്റോര്‍‌ ചെയ്യുകയും തങ്ങള്‍‌ക്കിഷ്‌ടമില്ലാത്തതൊക്കെ ഡിലീറ്റ് ചെയ്‌തു കൊണ്ടിരിക്കുകയും ചെയ്യുന്നു.ഇതില്‍ യഥാര്‍‌ഥ പ്രോഗ്രാം ഫയലുകള്‍ പോലും ഉള്‍‌പ്പെട്ടതിനാല്‍ സിസ്റ്റം ഹാങായിരിക്കുന്നു.റിഫ്രഷ്‌ കൊണ്ട്‌ കാര്യമില്ല.ഇനി റി സ്റ്റാര്‍‌ട്ട്‌ ചെയ്യാന്‍ സാധിച്ചാല്‍ മാത്രമേ സിസ്റ്റം പൂര്‍‌വസ്ഥിയിലേയ്‌ക്ക്‌ പരിവര്‍‌ത്തിപ്പിക്കാന്‍ കഴിയുകയുള്ളൂ.

അടിമകളാക്കപ്പെട്ടവരും,അടിച്ചമര്‍‌ത്തപ്പെട്ടവരും,അരിക്‌ വല്‍‌കരിക്കപ്പെട്ടവരും,
അവകാശങ്ങള്‍ നിഷേധിക്കപ്പെട്ടവരും ഒക്കെ പൊയ്‌പോയ ചരിത്രത്താളുകളിലും കഴിഞ്ഞു പോയിട്ടുണ്ട്‌.എന്നാല്‍ അവര്‍ ഒരു മോചനത്തെ കുറിച്ച്‌ സ്വപ്‌നങ്ങള്‍ നെയ്‌തിരുന്നു.കാരണം തങ്ങള്‍ മര്‍‌ദ്ദിതരാണെന്നു അവര്‍‌ക്ക്‌ നല്ല ബോധവും ബോധ്യവുമുണ്ടായിരുന്നു.എന്നാല്‍ വര്‍‌ത്തമാന കാലത്ത് മര്‍‌ദ്ദിതരില്‍ നല്ലൊരു ശതമാനവും ഒരു സുപ്രഭാതത്തെ കാത്തിരിക്കുന്നില്ല.സ്വപ്‌നങ്ങള്‍ നെയ്യുന്നുമില്ല.കാരണം അവര്‍ക്ക്‌ അറിയില്ല.തങ്ങള്‍ മര്‍‌ദ്ദിതരാണെന്ന്‌.അഥവ ചിന്താപരമായി ഉണരാനുള്ള സാഹചര്യങ്ങള്‍ പോലും ക്രുരമായി നിര്‍‌മാര്‍‌ജ്ജനം ചെയ്യപ്പെട്ടിരിക്കുന്നു.ഇതായിരിക്കണം വര്‍‌ത്തമാന ഇന്ത്യയുടെ ഏറ്റവും വലിയ വെല്ലുവിളി.

താഴെ തട്ടിലുള്ളവര്‍ക്ക്‌ പ്രത്യേകമായി ആത്മ ധൈര്യവും വീര്യവും തിരിച്ചറിവും ലഭിക്കും വിധമുള്ള പ്രസാരണ പ്രചാരണ ശിക്ഷണ പരിപാടികള്‍ നിരന്തരം നടക്കേണ്ടിയിരിക്കുന്നു.സാമൂഹ്യ സം‌വരണമെന്ന ഉദാത്ത സമ്പ്രദായത്തെ സാമ്പത്തിക സം‌വരണമെന്ന അതി സാമര്‍‌ഥ്യത്തിലേയ്‌ക്ക്‌ ചുരുക്കി കെട്ടിയതിനെ അഴിച്ചു മാറ്റാന്‍  പ്രേരകമാകുന്ന ശക്തമായ നയ നിലപാടുകള്‍ പുതിയ കാലത്തിന്റെ തേട്ടമാണ്‌.

പണ്ടു കാലങ്ങളില്‍ ആഢ്യ കുടും‌ബങ്ങളിലെ പ്രഭു കുമാരന്മാര്‍ പലരും അവര്‍‌ണ്ണരായ യുവതീ യുവാക്കളെ അക്രമിക്കുകയും,അവഹേളിക്കുകയും ഒരു വേള അവരുടെ ഇം‌ഗിതത്തിന്‌ ഇരയാക്കുകയും ഒക്കെ സാധാരണമായിരുന്നത്രെ.ആരും പ്രതികരിക്കുകയൊ പരാതിപ്പെടുകയൊ ചെയ്യുമായിരുന്നില്ല.ഒരുവേള പ്രഭുക്കള്‍‌ക്ക്‌ ഇതൊക്കെ അനുവദനീയമാണെന്നും തങ്ങള്‍ അവര്‍‌ണ്ണര്‍ പാവങ്ങള്‍ ഇതെല്ലാം സഹിക്കാനും പൊറുക്കാനും ബാധ്യസ്ഥരാണെന്നും ഈ സാധുക്കള്‍ വിശ്വസിച്ചു പോന്നിരുന്നു.

തീരെ സഹികെട്ട ചില രക്ഷിതാക്കള്‍ ഏറെ ഭവ്യതയോടെ തിരുമുറ്റത്തെത്തി പരാതിപ്പൊതി അഴിച്ചാലുള്ള പ്രതികരണം ഏറെ വിചിത്രമായിരുന്നു.തിരുമേനിമാര്‍ പറയുമായിരുന്നത്രെ "പ്രഭുകുമാരന്മാരുടെ ശീലും ശൈലിയുമൊക്കെ എല്ലാവര്‍‌ക്കും നല്ല ബോധ്യല്ലേ?എന്നിട്ട്‌ അവരെ മുമ്പീ ചെന്നു ചാടണെ ഇവറ്റകളെയൊക്കെയല്ലേ ചാട്ട മാറേണ്ടേ..?ഇതും പറഞ്ഞ്‌ പരാതിക്കാരെ അതി ക്രുരമായി പ്രഹരിക്കുകയും ആട്ടിയോടിക്കുകയും ചെയ്യുമായിരുന്നു.ഇത്തരം കഥകള്‍ അടഞ്ഞ അധ്യായമായി കണക്കാക്കപ്പെട്ടിരുന്നു.എന്നാല്‍ അതേ അടഞ്ഞ അന്ധകാരത്തിന്റെ അറകളും,പ്രജകളും വീണ്ടും സൃഷ്‌ടിക്കപ്പെടുന്നുണ്ടെന്നാണ്‌ പല സം‌ഭവങ്ങളും കൃത്യമായും വ്യക്തമാക്കി തരുന്നത്.ഇത്തരം തിരുമുറ്റങ്ങളുടെ പുനസൃഷ്‌ടിപ്പിലൂടെയാണ്‌ സവര്‍‌ണ്ണ ഫാഷിസ്റ്റുകള്‍ അജണ്ട പൂര്‍‌ത്തീകരിച്ചു കൊണ്ടിരിക്കുന്നത്.

ഭാരതീയ സം‌സ്‌കാര ധര്‍‌മ്മത്തില്‍ സവര്‍‌ണ്ണ മേധാവിത്തം അടിച്ചേല്‍‌പ്പിച്ച അബദ്ധ ധാരണകളും അന്ധ വിശ്വാസങ്ങളും പൂര്‍‌വാധികം ശക്തിയോടെ കാടു കയറുന്ന കാഴ്‌ച ഏതു ധര്‍‌മ്മ ബോധമുള്ളവനേയും ആശ്ചര്യപ്പെടുത്തും.കാലങ്ങളായി നവോത്ഥാന  നായകന്മാര്‍ നട്ടു വളര്‍‌ത്തിയ സുഗന്ധിപ്പൂക്കളെ നിഷ്‌കരുണം പിഴുതെറിഞ്ഞ്‌ തല്‍‌സ്ഥാനത്ത് ദുര്‍‌ഗന്ധികളെ വിരിയിപ്പിക്കുന്നതിലും വിളയിപ്പിക്കുന്നതിലും ഒരു പരിധിവരെ സവര്‍‌ണ്ണ ഫാഷിസം ഏറെ മുന്നിട്ടിരിക്കുന്നു എന്നു അനുമാനിക്കാനാകും.

രാജ്യം കണ്ട നെറികെട്ട ഒരു ഭരണ ക്രമത്തിലെ ദുരിതങ്ങളൊന്നും ഒരു പ്രയാസമുണ്ടാക്കിയതായി തോന്നാത്ത വിധം മാസ്‌മരികതയില്‍ ഈ ഹതഭാഗ്യര്‍ പെട്ടു പോയിരിക്കുന്നു. ഒരു പൊളിച്ചെഴുത്തിനെ കുറിച്ചൊ പുതിയ ഭരണ മാറ്റത്തെ കുറിച്ചൊ വേവലാധികള്‍ ഒട്ടും ഇല്ലാതെ കഴിയാന്‍ മാത്രം മാനസികമായ അടിമത്തത്തില്‍ കുരുക്കപ്പെട്ടിരിക്കുന്നു.  

ഏഷ്യയിലെ തന്ത്ര പ്രധാനമായ മഹത്തായ ഒരു രാജ്യത്തിന്റെ അടിത്തറ ഇളക്കാന്‍ പ്രയത്നിച്ചവരേയും പ്രവര്‍‌ത്തിക്കുന്നവരേയും പോലും ഭരണ സിരാ കേന്ദ്രത്തിലേയ്‌ക്ക്‌ നിയോഗിക്കാന്‍ ധാര്‍‌ഷ്‌ട്ര്യം കാണിക്കുവോളം ഭീകരമാണ്‌ ഈ ഉപ ഭൂഖണ്ഡത്തിന്റെ ശോചനീയാവസ്ഥ.

പറഞ്ഞു വരുന്നത്‌ ഭാരതം അതി ശീഘ്രം പിന്നോട്ട്‌ കുതിക്കുകയാണ്‌. കടുത്ത ദുര്‍‌ഗന്ധ ഭൂമികയിലാണ്‌ നാം.കൂരാകൂരിരുട്ടിലാണ്‌ രാജ്യം. ഇവിടെ കൈതിരികളും നെയ്‌തിരികളും കൊണ്ട്‌ മാത്രം ദിശകാണിക്കാന്‍ സാധിച്ചു കൊള്ളണമെന്നില്ല.ഇതൊക്കെ കണ്ട്‌ കാഴ്‌ചക്കാരായി നോക്കി നില്‍‌ക്കാന്‍ സത്യത്തിന്റെ വാഹകര്‍‌ക്ക്‌ - ദൈവത്തിന്റെ പ്രതിനിധികള്‍‌ക്ക്‌ സാധ്യവുമല്ല.

ഒരു പൂര്‍‌ണ്ണ ചന്ദ്രോദയം പെയ്യുന്ന പൂനിലാവ്‌ പ്രതീക്ഷിച്ചുള്ള നിഷ്‌കളങ്കമായ പ്രവര്‍‌ത്തന നൈരന്തര്യം തന്നെയാണ്‌ അഭികാമ്യം . ഇതിന്നായിരിക്കട്ടെ സുമനസ്സുക്കളുടെ പ്രതിജ്ഞയും പ്രാര്‍‌ഥനയും.

ഇസ്‌ലാം ഓണ്‍‌ലൈവിനു വേണ്ടി 

Saturday, April 13, 2019

നൂല്‌ പൊട്ടിയ പട്ടം കണക്കേ

ലജ്ജ ഒരു സംസ്‌കാരമാണ്‌.ലജ്ജയില്ലായ്‌മ മറ്റൊരു സംസ്‌കാരവും. മോഹിപ്പിക്കാനുള്ള തരളിത സങ്കല്‍‌പങ്ങളില്‍ പരിസരം മറന്നുല്ലസിക്കുന്നവരത്രെ ലജ്ജ കെട്ടവര്‍.ഈ വളയത്തില്‍ മുഖം കുത്തി വീഴുന്നവരത്രെ മനസ്സു കെട്ടവര്‍.

അരുതായ്‌മകളുടെ ചൂരലുകളല്ല.മാന്യമായ സംസ്‌കാരത്തെ അനുഭവേദ്യമാക്കാനുള്ള ക്രിയാത്മകമായ കര്‍മ്മ സരണികളാണ്‌ രൂപപ്പെടേണ്ടത്‌.ഒരു സമൂഹം നിഷ്‌കാസനം ചെയ്യപ്പെടാന്‍ പോകുന്നതിന്റെ സൂചനയായി ലജ്ജയില്ലാത്തവരുടെ പെരുപ്പത്തെ നിരീക്ഷിക്കുന്നവരും ഉണ്ട്‌.

സമാധാനവും സ്വസ്ഥതയും വെറുതെ ആഗ്രഹിച്ചത് കൊണ്ട്‌ മാത്രം നടക്കുന്ന കാര്യമല്ല. കേവലമായ കടുത്ത ശിക്ഷകളും പര്യാപ്‌തമായിക്കൊള്ളണമെന്നില്ല. വിളക്ക്‌ തറയില്‍ വെച്ചിട്ട്‌ നീന്തിക്കളിക്കുന്ന കുട്ടിയോട്‌ തൊടരുതെന്ന്‌ പറഞ്ഞിട്ട്‌ കാര്യമില്ല. അപകട സാധ്യതകളും സാഹചര്യങ്ങളും വളരെ പ്രധാനമാണ്‌.ഈ പ്രാധാന്യം ഊന്നിപ്പറയുന്ന ദര്‍‌ശനമാണ്‌ വിശുദ്ധ ഖുര്‍‌ആന്‍.ഇത്‌ മറന്നു എന്നതായിരിക്കണം വര്‍‌ത്തമാന ലോകത്തിന്റെ പരാജയവും.

കപടന്മാരായ പാതിരാ പ്രഭാഷകരും,കടപുഴകിയ പാതിരി പ്രഭുക്കളും,വഴിപിഴച്ച സന്യാസികളും,എല്ലാ അര്‍‌ഥത്തിലും ജീര്‍‌ണ്ണത ബാധിച്ച സാമൂഹ്യ സാം‌സ്‌കാരിക രാഷ്‌ട്രീയ നായകന്മാരും ഈ സമൂഹ ഗാത്രത്തെ ബാധിച്ച മാരകമായ രോഗത്തിന്റെ അതി ഭയാനക ദുരവസ്ഥയെയാണ്‌ വിളിച്ചോതുന്നത്.അല്ലാതെ അവര്‍ വഹിച്ചു നില്‍‌ക്കുന്ന ദര്‍‌ശനങ്ങളുടേയും വേദങ്ങളുടേയും സാമൂഹ്യ ശാസ്‌ത്രങ്ങളുടേയും അവസ്ഥയെയല്ല.തേനും തേനറകളും ചുമന്ന്‌ നില്‍‌ക്കുന്ന ദുര്‍‌ബലങ്ങളായ വൃക്ഷ ശിഖിരിങ്ങളും പഴകി ദ്രവിച്ച മരങ്ങളും മടകളും നോക്കി മധുവിന്റെ ഔഷധ ഗുണം നിശ്ചയിക്കുന്നത് മൗഢ്യമത്രെ.

വിവിധ മത ദര്‍‌ശനങ്ങളിലുള്ളവര്‍ തങ്ങള്‍‌ക്ക്‌ അനുശാസിക്കപ്പെടുന്ന ധാര്‍‌മ്മിക സനാതന മൂല്യങ്ങളെ മുഖവിലക്കെടുക്കുന്നില്ല എന്നതാണ്‌ അവരുടെ സാം‌സ്‌കാരിക സമൂഹ്യാവസ്ഥയുടെ ജീര്‍‌ണ്ണതകള്‍‌ക്ക്‌ കാരണം.എന്നാല്‍ നിഷേധികള്‍; തങ്ങളുടെ വികലമായ നിരീക്ഷണങ്ങള്‍ ആത്മാര്‍‌ഥതയോടെ പാലിക്കാന്‍ ശ്രമിച്ചു കൊണ്ടിരിക്കുന്നു എന്നതായിരിക്കണം അവരുടെ സാം‌സ്‌കാരിക സാങ്കല്‍‌പികാവസ്ഥയുടെ ദുരന്തങ്ങള്‍‌ക്ക്‌ കാരണം.

ജീവിതത്തിന്റെ സുഖമമായ ഒഴുക്കിനെ ത്വരിതപ്പെടുത്താന്‍ ചില നിബന്ധനകളും ഉപാധികളും ഒക്കെ അനിവാര്യമാണ്‌.എന്നാല്‍ വര്‍ത്തമാന കാല സമൂഹത്തിലെ നല്ലൊരു ശതമാനം വിശിഷ്യാ പുതു തലമുറ ഇത്തരം നിര്‍ദേശങ്ങളും ഉപദേശങ്ങളും ഒഴിവാക്കാനുള്ള കടുത്ത ജാഗ്രത പുലര്‍ത്തുന്നുവെന്നത്‌ ദൌര്‍ഭാഗ്യകരമത്രെ.തന്റെ സ്വഛമായ സഞ്ചാര സ്വാതന്ത്ര്യം നിബന്ധനകള്‍ക്കതീതമാകണമെന്ന തീരുമാനത്തോടെ ഒരാള്‍ യാത്ര തുടങ്ങുന്നതെങ്കില്‍  അതു വകവെച്ചുകൊടുക്കാന്‍  ആരും തയാറാകുകയില്ല.

വാഹനങ്ങളില്‍ ലക്ഷ്യസ്ഥാനത്തേയ്‌ക്കുള്ള സഞ്ചാരത്തിനിടയ്‌ക്ക്‌ പാതയോരത്ത്‌ പ്രത്യക്ഷപ്പെടുന്ന ദിശാസൂചികകളും  അപകട സൂചനകളും നിയമങ്ങളും കണ്ടില്ലെന്ന്‌ നടിക്കാന്‍ വിശേഷ ബുദ്ധി നല്‍കപ്പെട്ടവര്‍ക്ക്‌ കഴിയുമോ ?  ഇല്ല എന്ന്‌ നിമിഷാര്‍‌ധം കൊണ്ട്‌ പറയാനാകുന്നുവെങ്കില്‍ അത്‌ ജീവിതത്തിനും ബാധകമായിരിക്കണം.

ഭൗതികമായ സകല വിധ അഭിലാഷങ്ങളുടേയും പൂര്‍‌ത്തീകരണത്തിന്‌ ഏതു വിധേനയും അര്‍‌ഹമായതെന്നോ അനര്‍‌ഹമായതെന്നോ  നിബന്ധനയില്ലാതെ വാരിക്കൂട്ടുന്ന രക്ഷിതാക്കള്‍ വലിയ ഭവിഷ്യത്തുകളെ നേരിടുകയാണ്‌.പ്രായം തികഞ്ഞവരും ഒരുവേള തികയാത്തവരുമായ സന്താനങ്ങള്‍ തങ്ങളുടെ ശാരീരികാവശ്യങ്ങള്‍ക്ക്‌ ഏതു വിധേനയും അനുവദനീയമെന്നോ അല്ലാത്തതെന്നോ പ്രശ്‌നമില്ലാതെ  നിറവേറ്റുക എന്ന സാമാന്യ ബോധത്തിലേയ്‌ക്ക്‌ തെളിക്കപ്പെട്ടു കൊണ്ടിരിക്കുന്ന കാഴ്‌ച ഹൃദയഭേദകമായിരിക്കുന്നു.

വിദ്യാര്‍ഥിനികള്‍ കൂട്ടം കൂടിയിരുന്ന്‌ ലഹരി ഉപയോഗിച്ച്‌ കുടിച്ച്‌ കൂത്താടുന്നത് വീഡിയോവില്‍ പകര്‍‌ത്തി സാമൂഹ്യ മാധ്യമങ്ങളില്‍ പോസ്റ്റ്‌ ചെയ്‌ത്‌ വീണ്ടും വീണ്ടും ആസ്വദിച്ച്‌ ആത്മരതികൊള്ളുന്നു.ഒരു പക്ഷെ ആണ്‍‌കുട്ടികളെക്കാള്‍ പെണ്‍‌കുട്ടികളാണ്‌ ജീവിതത്തിലെ നിയന്ത്രണ രേഖ മറികടക്കുന്നതില്‍ മുന്‍‌പന്തിയിലെന്നു പോലും വിലയിരുത്തപ്പെടുന്നുണ്ട്‌.ഹൈസ്ക്കൂള്‍ വിദ്യാര്‍‌ഥികള്‍ ക്ഷണികമായ ആവേശത്തില്‍ തങ്ങള്‍‌ക്ക്‌ ഇഷ്‌ടപ്പെട്ടവരുടെ കൂടെ ഇറങ്ങിപ്പുറപ്പെടുന്നത് സോഷ്യല്‍ മീഡിയയിലൂടെ തല്‍‌ക്ഷണം പ്രസരിപ്പിക്കാന്‍ മടിയില്ലാത്ത വിധം ഈ സാം‌സ്‌കാരിക അരാജകത്വം വളര്‍‌ന്നു പന്തലിച്ചിരിക്കുന്നു.

സ്‌ത്രീ പുരുഷന്മാരൂടെ ജന്മസിദ്ധമായ പരസ്‌പരാകര്‍‌ഷണം എന്ന തലത്തിനും അപ്പുറമാണ്‌ ഇന്നത്തെ കാഴ്‌ചകള്‍.നാല്‍‌കാലികളുടെ സൗന്ദര്യ ബോധം പോലും ഇല്ലാത്ത ഇരുകാലികള്‍. മൃഗീയതയെന്നു പൊലും പറയാന്‍ പറ്റാത്ത  വിധം  കാര്യങ്ങള്‍ വികലവും  വികൃതവുമായിരിക്കുന്നു. 

മധ്യവസ്‌കരായ ഉപ്പാപ്പമാരുടെ കൈകളില്‍ ഇളം പൈതങ്ങള്‍ സുരക്ഷിതരല്ലെന്നു വന്നിരിക്കുന്നു. പ്രായമായ സ്‌ത്രീകള്‍ തന്റെ പേരമകന്റെ പ്രായം പോലുമില്ലാത്ത കൗമാരക്കാരുമായി കിടക്ക പങ്കിടുന്നു.നൊന്തു പ്രസവിച്ച പൈതലിനെ പോലും തന്റെ ശാരീരികമായ ആവശ്യത്തിന്റെ മുന്നില്‍ വിലങ്ങാകാന്‍ രാജിയാകാത്ത ശാഠ്യത്തോളം കാമം പടര്‍‌ന്നു കയറിയിരിക്കുന്നു.മൂന്നും നാലും മക്കളുള്ള കുടും‌ബിനികള്‍ ഒരു സുപ്രഭാതത്തില്‍ ആരുടെയൊക്കെയോ കൂടെ  വീടുവിട്ടിറങ്ങി പോകുന്നു.ഇക്കഴിഞ്ഞ പതിനൊന്നു മാസത്തിനിടക്ക്‌ ഏകദേശം മുവ്വായിരത്തോളം കുടും‌ബിനികള്‍ കുടും‌ബം ഉപേക്ഷിച്ച്‌ പോയതായി പരാതിപ്പട്ടികകള്‍ മാത്രം ഉദ്ദരിച്ച്‌  വാര്‍‌ത്താ മാധ്യമങ്ങള്‍ വെളിപ്പെടുത്തുന്നു. ഇത്തരം സാമൂഹ്യ പശ്ചാത്തലം പണ്ടൊക്കെ ഭാവനക്ക്‌ പോലും വഴങ്ങുമായിരുന്നില്ല.

രാജ്യത്ത് മതമുള്ളവരും ഇല്ലാത്തവരുമായ മാതാപിതാക്കള്‍ വലിയ ദുരന്തങ്ങള്‍‌ക്ക്‌ സാക്ഷികളായിക്കൊണ്ടിരിക്കുന്നു. എല്ലാവരും ഈ കുളിമിറിയില്‍ പൂര്‍‌ണ്ണ നഗ്നരാണ്‌.കുടും‌ബം എന്ന മഹത്തായ സ്ഥാപനം അക്ഷരാര്‍‌ഥത്തില്‍ താറുമാറായിക്കഴിഞ്ഞിരിക്കുന്നു.ഇതിനെ പുനസ്ഥാപിക്കാനുള്ള തീവ്രയജ്ഞ പരിപാടികള്‍‌ക്ക്‌ രാജ്യത്തെ വിവിധ തലങ്ങളിലുള്ള സുമനസ്സുക്കളായ സാം‌സ്‌കാരിക നേതൃത്വം ഉറക്കെ ചിന്തിക്കേണ്ട കാലം അതിക്രമിച്ചിരിക്കുന്നു.

വിദ്യാര്‍‌ഥികളുടെ അച്ചടക്കരാഹിത്യത്തെയും അനഭലഷീണയമായ പെരുമാറ്റങ്ങളെയും കുറിച്ച്‌ വേവലാധിപ്പെടുകയാണ്‌ സമൂഹം.സത്യത്തില്‍ രക്ഷിതാക്കള്‍ തങ്ങളുടെ സന്താനങ്ങളെ അറിഞ്ഞും അറിയാതെയും ബലിയാടുകളാക്കുകയാണ്‌.രക്ഷിതാക്കളെ കുറിച്ചും അധ്യാപകരെ കുറിച്ചും കൃത്യമായി പഠിക്കുകയും അതിനനുസൃതമായ ശിക്ഷണ സംസ്‌കരണ പ്രക്രിയകള്‍‌ തുടക്കം കുറിക്കാനുമായിരിക്കണം വിദ്യാഭ്യാസ സമ്പ്രദായത്തിലെ പ്രഥമ പരിഗണന.അഥവാ വിദ്യാര്‍‌ഥികളേക്കാള്‍ കൂടുതല്‍ ശിക്ഷണങ്ങള്‍ വേണ്ടത് രക്ഷിതാക്കള്‍‌ക്കും അധ്യാപകര്‍‌ക്കുമായിരിക്കണം.രോഗാതുരമായ ഭിഷഗ്വരന്മാരുടെ ആരോഗ്യ പഠന ശിബിരങ്ങള്‍പോലെ വിദ്യയും വിദ്യാലയങ്ങളും മാറിക്കൂടാ.

നാം ഇന്ന്‌ എല്ലാ അര്‍‌ഥത്തിലും സമ്പന്നരും സന്തുഷ്‌ടരുമാണ്‌.പക്ഷെ ലൈം‌ഗിക കാര്യങ്ങളില്‍ അധികപേരും ദരിദ്രരും അസന്തുഷ്‌ടരും.ഈ നിരീക്ഷണത്തെ ഗൗരവത്തില്‍ പഠനവിധേയമാക്കി വര്‍‌ത്തമാനകാല  സാമൂഹ്യാവസ്ഥയുടെ പെരുമാറ്റച്ചട്ടങ്ങളില്‍  ശാസ്‌ത്രീയമായ ഉടച്ചു വാര്‍‌ക്കലുകള്‍ അനിവാര്യമത്രെ.

അപകടമരണങ്ങളില്‍ ഏറിയ ശതമാനവും വാഹനങ്ങളില്‍  ഹരം പിടിച്ച്‌ ചീറി പായുന്ന പുതു തലമുറയാണെന്ന്‌ കണക്കുകള്‍ പറയുന്നു. ജീവിത യാത്രയിലും പരാജയം ഏറ്റുവാങ്ങുന്നവര്‍ ഈ യുവത തന്നെയാണത്രെ.

ഇങ്ങനെയാണെങ്കില്‍ വരും കാല തലമുറ തന്നെ വേരറ്റു കുലമറ്റു പോകാനുള്ള സാധ്യതകള്‍ തള്ളിക്കളയാന്‍ കഴിയില്ല. ഈ ഇരുള്‍ മൂടിയ കാര്‍‌മേഘങ്ങള്‍ തിമര്‍‌ത്തു പെയ്‌തിറങ്ങാന്‍ തുടങ്ങിയാല്‍ കൊടും നാശത്തിന്റെ സുനാമി തന്നെയാണ്‌ രാജ്യത്തെ - ലോകത്തെ കാത്തിരിക്കുന്നത്.

വര്‍‌ത്തമാന കാലത്തെ രാജ്യം നേരിടുന്ന വെല്ലുവിളി കേവലം കുത്തഴിഞ്ഞ രാഷ്‌ട്രീയ മേഖല മാത്രമല്ല.പൂര്‍‌ണ്ണാര്‍‌ഥത്തിലുള്ള സാംസ്‌കാരിക അപജയം എന്നതു കൂടെയായിരിക്കണം.രാഷ്‌ട്രീയമായും സാമൂഹ്യമായും ഒരു പുതിയ രാജ്യം എന്ന സങ്കല്‍പത്തെ പടുത്തുയര്‍‌ത്താനാകുന്ന സാം‌സ്‌കാരിക പരിസരത്തെ കുറിച്ചുള്ള ചിന്തകളും ചര്‍‌ച്ചകളും ആരോഗ്യകരമായ സം‌വാദങ്ങളും സജീവമാകേണ്ടതുണ്ട്‌.

സാമൂഹ്യ പ്രതിബദ്ധതയുടെ പേരില്‍ വിശിഷ്യാ വിശ്വാസികളുടെ വിലാസത്തില്‍ രൂപീകരിക്കപ്പെട്ട സം‌ഘടനകള്‍ ഇപ്പോഴും സാങ്കേതിക സൗകര്യങ്ങളുടെ കോട്ട കൊത്തളങ്ങള്‍ കെട്ടിപ്പടുക്കുവാനുനുള്ള കടുത്ത ശ്രമങ്ങളിലാണ്‌.അത്രയൊന്നും വ്യഗ്രത ഒരു സമൂഹത്തെ ഉദ്ദരിക്കാന്‍ കാണിക്കുന്നില്ലെന്നതും ശ്രദ്ദേയമാണ്‌.വഴി നന്നാക്കാനും പള്ളിയും പള്ളിക്കൂടങ്ങളും നന്നാക്കാനും കൂലി പ്രഭാഷണങ്ങള്‍ സം‌ഘടിപ്പിക്കുന്നവര്‍ക്ക്‌ മനുഷ്യനെ നന്നാക്കാനുള്ള അത്രയൊന്നും പരിപാടികള്‍ അജണ്ടയിലില്ല.മറിച്ച്‌ വിശ്വാസികളെ പറഞ്ഞു പറ്റിക്കുന്ന വൃത്തിയില്‍ ഒരു കുറവും വരുത്താതിരിക്കാനുള്ള ബദ്ധപ്പാടിലുമാണ്‌ .ഏതു കെണിയിലും കുരുങ്ങാന്‍ പ്രതിജ്ഞാബദ്ധരായ സാധുക്കളും.

നൂല്‌ പൊട്ടിയ പട്ടം കണക്കേ ഒരു പുതു തലമുറ തലങ്ങും വിലങ്ങും ഗതികിട്ടാതെ പാറുകയാണ്‌.ഈ അസ്വാഭാവികതയെ പോലും ആസ്വദിക്കാന്‍ പാകപ്പെട്ട മനസ്സുമായി പഴയ തലുമുറയും.ഇനി എന്ത്‌ എന്ന ചകിത ചിന്തയില്‍ അടിപതറാതെ നിശ്ചയ ദാര്‍‌ഢ്യത്തോടെ രംഗം വിടാത്ത ഒരു സം‌ഘം സജീവം.പ്രതീക്ഷ കൈവിടാത്ത ഈ ന്യൂനാല്‍ ന്യൂന പക്ഷത്തിന്റെ ശുഭ പ്രതീക്ഷകള്‍‌ക്ക്‌ നല്ല തങ്കത്തിളക്കം..

ഇസ്‌ലാം ഓണ്‍‌ലൈവിനു വേണ്ടി

Wednesday, April 10, 2019

സമ്മതിദായകന്റെ ചൂണ്ടു വിരല്‍

ആഹാരം കൊടുത്തു വിശപ്പകറ്റുകയും ശാന്തി ചൊരിഞ്ഞു ഭയമകറ്റുകയും ചെയ്‌‌ത നാഥനെ വണങ്ങാനും വഴങ്ങാനും' എന്ന അധ്യാപനം  ഖുര്‍‌ആനിലെ ഖുറൈഷ്‌ എന്ന ചെറിയ അധ്യായത്തില്‍ വായിക്കാനാകും.വിശപ്പിന്റെ പരിഹാരം പോലെ നിര്‍‌ഭയത്വവും വലിയ അനുഗ്രഹമായാണ്‌ വിശുദ്ധ വചനം ഓര്‍‌മ്മിപ്പിക്കുന്നത്.സമാധാന പ്രിയരെ ഭയ ചകിതരാക്കാനുള്ള കടുത്ത ശ്രമങ്ങളാണ്‌ പലപ്പോഴും ദുശ്ശക്തികളുടെ ഭാഗത്ത്‌ നിന്നും നിരന്തരം അനുഭവപ്പെട്ടു കൊണ്ടിരിക്കുന്നത്.ഭീതിതമായ അരക്ഷിതാവസ്ഥയില്‍ നിന്ന്‌ നിര്‍‌ഭയത്വത്തിലേയ്‌ക്കുള്ള മോചനമാണ്‌ വരുന്ന തെരഞ്ഞെടുപ്പിലൂടെ സാധ്യമാകേണ്ടത്.ഇതു വഴി കുത്തഴിഞ്ഞ ജനാധിപത്യ സം‌സ്‌കാരവും ഭരണഘടനാ സം‌വിധാനങ്ങളും പുനഃപ്രതിഷ്‌ടിക്കപ്പെട്ടേക്കാം.

ഫാഷിസ്‌റ്റുകളുടെ പ്രകടന പത്രിക പോലും എത്ര ധാര്‍‌ഷ്‌ട്ര്യത്തോടെയാണ്‌ അജണ്ടകള്‍ പ്രഖ്യാപിച്ചിട്ടുള്ളത്.രാജ്യത്ത്‌ ഫാഷിസത്തിന്റെ തേരാളികള്‍ യാതൊരു മറയുമില്ലാതെ വളരെ സ്‌പഷ്‌ടമായ ഭാഷയിലാണ്‌ അക്രോശങ്ങളും വെല്ലുവിളികളും നടത്തിക്കൊണ്ടിരിക്കുന്നത്.ഗൂഢ ലക്ഷ്യങ്ങളോട് കൂടിയ അജണ്ടയുടെ ഭാഗമായിരിക്കണം ഈ അട്ടഹാസങ്ങളും ഭീതി വിതയ്‌ക്കലും. ഇത്തരം സാഹചര്യങ്ങളില്‍ സമചിത്തതയോടെ ബുദ്ധിപൂര്‍‌വ്വകമായ നിലപാടുകളായിരിയ്‌ക്കും സമാധാന കാം‌ക്ഷികള്‍‌ക്ക്‌ വിശിഷ്യാ വിശ്വാസികള്‍‌ക്ക്‌ അഭികാമ്യം. സമാധാനാന്തരീക്ഷത്തിലേയ്‌ക്ക്‌ വഴിതെളിയിക്കാന്‍ ക്രിയാത്മകമായ രീതിയാണ്‌ ക്ഷേമ രാഷ്‌ട്ര വിഭാവനയ്‌ക്ക്‌ ഊടും പാവും നെയ്യുന്ന വെല്‍‌ഫയര്‍ പാര്‍ട്ടി ഓഫ്‌ ഇന്ത്യയുടെ സുചിന്തിതമായ രാഷ്‌ട്രീയ സമീപനം.ഈ നയവും നിലപാടും വ്യാപകമായ തോതില്‍ സ്വാഗതം ചെയ്യപ്പെടുന്നു എന്നതും സന്തോഷ ദായകമത്രെ.രാജ്യ താല്‍‌പര്യത്തിന്‌ മുന്‍‌ഗണന എന്ന ആശയം ഏറെ സര്‍‌ഗാത്മകമാക്കാന്‍ പുതുതായി ജന്മം കൊണ്ട ഒരു രാഷ്‌ട്രീയ പാര്‍‌ട്ടിക്ക്‌ സാധിച്ചു എന്നതിന്റെ പ്രതികരണങ്ങള്‍ രാജ്യമൊട്ടാകെ പ്രകാശിപ്പിക്കാനായി എന്നതിന്റെ തെളിവുകളും പ്രകടമായിക്കൊണ്ടിരിക്കുന്നുണ്ട്‌.

ഇന്ത്യാ രാജ്യത്ത്‌ രാഷ്‌ട്രിയ വര്‍‌ത്തമാനങ്ങളില്‍ കേരളത്തിന്റെ വികസനവുമായി ബന്ധപ്പെട്ട ചര്‍‌ച്ചകളില്‍ അതതു കാലത്തെ സംസ്ഥാന സര്‍‌ക്കാറുകള്‍ വലിയ തോതില്‍ വാചാലരാകാറുണ്ട്‌.സത്യത്തില്‍ ഇന്ത്യയിലെ ഇതര സംസ്ഥാനങ്ങളിലെ സര്‍‌ക്കാറുകളെ കവച്ചു വെയ്‌ക്കുന്ന തരത്തിലുള്ള എടുത്തുദ്ധരിക്കാന്‍ കഴിയുന്ന പ്രവര്‍‌ത്തനങ്ങളൊന്നും മാറി മാറി വരുന്ന ഇടതും വലതും സര്‍‌ക്കാറുകളുടെ ഭാഗത്ത്‌ നിന്നും ഉണ്ടായിട്ടില്ല എന്നതായിരിക്കണം കൂടുതല്‍ ശരി.അത്തരം വികസനോന്മുഖമായ അജണ്ടകള്‍ ക്രമ പ്രവര്‍‌ദ്ധമായി പ്രാഫല്യത്തില്‍ വരുത്താനുതകുന്ന കൃത്യമായ വിഭാവനകള്‍ ദേശീയാടിസ്ഥാനത്തിലും വേണ്ടത്ര അളവില്‍ രൂപം കൊടുക്കപ്പെട്ടിട്ടില്ല. എന്തെങ്കിലും ഉണ്ടായിട്ടുണ്ടെങ്കില്‍ തന്നെ ഫലപ്രദമായി നടപ്പാക്കാനും പൂര്‍‌ണ്ണാര്‍ഥത്തില്‍ സാധിച്ചിട്ടുമില്ല.

ഇന്ത്യിയിലെ ഇതര സംസ്ഥാനങ്ങളുടെ മുന്നില്‍ കേരളം തല ഉയര്‍‌ത്തി നില്‍‌ക്കുന്നതിന്റെ കാരണക്കാരായി കൊട്ടിഘോഷിച്ച്‌ തെരഞ്ഞെടുപ്പിനെ നേരിടാന്‍ മാത്രം ഒന്നും ഇവിടെ സം‌ഭവിച്ചിട്ടില്ല എന്ന്‌ ചുരുക്കം.എന്നു മാത്രമല്ല ഇപ്പോള്‍ അതിന്റെ സമയവുമല്ല.പൂര്‍‌ണ്ണാര്‍‌ഥത്തിലുള്ള ജനാധിപത്യ സം‌സ്‌കാരത്തില്‍ രാജ്യം നില നില്‍‌ക്കണമെന്ന ആശയത്തെ ഗൗരവത്തില്‍ ഉള്‍‌കൊള്ളാന്‍ ഇടതു പക്ഷങ്ങള്‍‌ക്ക്‌ കഴിയുന്നില്ല എന്നതില്‍ ഏറെ സങ്കടപ്പെടുകയാണ്‌ രാജ്യത്തെ സുമനസ്സുക്കള്‍.

കേരളത്തിലെ ഗ്രാമങ്ങള്‍ ഇതര സംസ്ഥാനങ്ങളെ അപേക്ഷിച്ച്‌ സമ്പന്നമാണ്‌.അതിന്റെ കാരണവും സുവിദിതമാണ്‌. അതു കൊണ്ട്‌ തന്നെ ഗ്രാമ പഞ്ചായത്ത്‌ ത്രിതല പഞ്ചായത്ത് ജില്ലാ പഞ്ചായത്ത് തുടങ്ങിയ സ്ഥാപനങ്ങളേയും സം‌വിധാനങ്ങളേയും ക്രിയാത്മകമാക്കാന്‍ ഒരു പരിധിവരെ കഴിയുന്നുണ്ട്‌.വൈദ്യുതീകരിച്ച വീടുകള്‍,വഴി വിളക്കുകളുള്ള ചെറുതും വലുതുമായ വീഥികള്‍,ഗ്രാമങ്ങള്‍ തോറും വിദ്യാലയങ്ങള്‍,ആരോഗ്യ കേന്ദ്രങ്ങള്‍,സര്‍‌ക്കാര്‍ തലത്തിലും സര്‍‌ക്കേതര സം‌രം‌ഭങ്ങള്‍ വഴിയുമുള്ള ആധുനിക സൗകര്യങ്ങളുള്ള ആതുരാലയങ്ങള്‍ ,സര്‍‌വ്വ സജ്ജമായ പണമിടപാട്‌ കേന്ദ്രങ്ങളുടെ ചെറുതും വലുതുമായ ശാഖകള്‍,അത്യാധുനിക സൗകര്യങ്ങളുള്ള കച്ചവട കേന്ദ്രങ്ങള്‍,കളി സ്ഥലങ്ങള്‍, വിശ്രമ കേന്ദ്രങ്ങള്‍, പൂങ്കാവനങ്ങള്‍, വിനോദ സഞ്ചാര കേന്ദ്രങ്ങള്‍ തുടങ്ങി ശരാശരി നന്നായി പുരോഗതി പ്രാപിച്ച പട്ടണ പ്രദേശത്തെ സൗകര്യങ്ങള്‍ ഗ്രാമ പ്രാന്ത പ്രദേശങ്ങളില്‍ പോലും സുലഭമത്രെ.

ഇതിന്റെയൊക്കെ കാര്യ കാരണങ്ങള്‍ തേടിയാല്‍ കേരളത്തിലെ പ്രവാസി സമൂഹമാണെന്നു ഒറ്റവാക്കില്‍ പറയാന്‍ സാധിക്കും.താത്വികമായ വിശദീകരണങ്ങള്‍ ഇപ്പോള്‍ നടത്തുന്നില്ല.ഇന്ത്യയിലെ ഇതര സം‌സ്ഥാനങ്ങളിലെ പട്ടണങ്ങളൊ,തലസ്ഥാന നഗരികളൊ പ്രസിദ്ധങ്ങളാകുമ്പോള്‍;കേരളമെന്ന സംസ്ഥാനമാണ്‌ വിദേശികള്‍ക്കിടയില്‍ പ്രസിദ്ധം എന്നതും അടിവരയിടപ്പെടേണ്ടതാണ്‌.

പ്രാദേശിക സം‌സ്‌ഥാന കേന്ദ്ര ആസുത്രണങ്ങള്‍ വഴി പ്രഖ്യാപിക്കപ്പെടുന്ന കര്‍‌മ്മ പദ്ധതികളെ യഥോചിതം ജനങ്ങളിലേക്കെത്തിക്കാന്‍ മാത്രം ശുഷ്‌കാന്തിയുള്ള ജന പ്രതിനിധികളും തുലോം വിരളമാണ്‌.ഇനി സകല കെട്ടും പൊട്ടിച്ച്‌ വല്ലതുമൊക്കെ വീണു കിട്ടിയാല്‍; ഗ്രാമ പഞ്ചായത്ത് - നിയമ സഭാ സാമാജികര്‍ മുതല്‍ ലോക്‌ സഭാ പ്രതിനിധികള്‍ വരെയുള്ളവര്‍ തങ്ങളുടെ തറവാട്ടുവക നാടിന്‌ ഔദാര്യം  ചെയ്‌തതു പോലെയാണ്‌ അതെല്ലാം സമര്‍‌പ്പിക്കുന്നതും.

വിവരവും വിദ്യാഭ്യാസവുമുള്ള ഓരോ കേരളീയനും തന്റെ സമ്മതിദാനകവകാശം രേഖപ്പെടുത്തുമ്പോള്‍ കൃത്യമായ വീക്ഷണങ്ങളുള്ള നിലപാടുകള്‍ ഉള്ള രാഷ്‌ട്രീയ തീരുമാനങ്ങളോട്‌ ജാഗ്രതയില്ലാത്തവരാകാന്‍ പാടില്ല.റൊട്ടി കപ്പട മകാന്‍ എന്ന ചിര പുരാതന മുദ്രാവാക്യത്തോടൊപ്പം വിദ്യാഭ്യാസം, ജനോപകാര പ്രദമായ വികസനം,സാഹോദര്യം,ശാന്തി സമാധാനം എന്നതിനെ കൂടെ അക്ഷരാര്‍‌ഥത്തില്‍ ഉയര്‍‌ത്തി കാട്ടുന്ന മുന്നേറ്റങ്ങളെ പരിഗണിക്കേണ്ടതും കാലഘട്ടത്തിന്റെ തേട്ടമത്രെ.

സൗഹൃദാന്തരീക്ഷവും ശാന്തിയും സമാധാനവും പരമ പ്രധാനമാകുമ്പോള്‍ അതിന്നിണങ്ങുന്ന ക്രിയാത്മകമായ രാഷ്‌ട്രീയ നിലപാടിനായിരിക്കണം മുന്തിയ പരിഗണന.ഏറെ മഹിമകളും പാരമ്പര്യവും അവകാശപ്പെടുന്ന ഇന്ത്യാ മഹാ രാജ്യത്തിന്റെ കൊട്ടിഘോഷിക്കപ്പെടുന്ന ജനാധിപത്യ സാം‌സ്‌കാരിക പൈതൃകവും ധാര്‍‌മ്മിക സനാതന മൂല്യങ്ങളും തിരിച്ചു പിടിക്കാനുള്ള ദൗത്യത്തെ ആദ്യം വിജയിപ്പിക്കാം.

രാജ്യത്ത്‌ ജനാധിപത്യ സം‌സ്‌കാരം നില നില്‍‌ക്കേണ്ടത് കാലഘട്ടത്തിന്റെ തേട്ടമത്രെ.ഫാഷിസത്തെ പടിയിറക്കുക എന്ന ഒരേ ഒരു മുദ്രാവാക്യത്തിനു മാത്രമേ ഇപ്പോള്‍ പ്രസക്തിയുള്ളൂ.ഈ മഹത്തായ ലക്ഷ്യ സാക്ഷാല്‍‌കാരത്തിന്‌ വേണ്ടിയുള്ള പഴുതടച്ച രാഷ്‌ട്രീയ നീക്കങ്ങള്‍ക്ക്‌ ജനാധിപത്യ വിശ്വാസികള്‍ പ്രതിജ്ഞാ ബദ്ധരായിരിക്കണം.

പ്രഭുകുമാന്മാരാണെന്ന ഭാവത്തില്‍ കപട ജന സേവകര്‍ അഭിരമിക്കുമ്പോള്‍ അവരുടെ മസ്‌തകത്തില്‍ നോക്കി പ്രഹരിക്കാനുള്ള  ആയുധമത്രെ  സമ്മതിദായകന്റെ  ചൂണ്ടു വിരല്‍. ജനാധിപത്യ സം‌വിധാനത്തിലെ ഈ ശക്തിയേറിയ ആയുധം ഉപയോഗപ്പെടുത്തുമ്പോള്‍ ദൃഢ നിശ്ചയത്തോടെയായിരിക്കണം ജനാധിപത്യം പുലരാന്‍ ആഗ്രഹിക്കുന്നവരുടെ ധര്‍‌മ്മവും കര്‍‌മ്മവും.

ഇസ്‌ലാം ഓണ്‍‌ലൈവിനു വേണ്ടി

Saturday, April 6, 2019

മുന്‍ വിധികളുടെ കാക്കി ബോധങ്ങള്‍

നമ്മുടെ ഇന്ത്യാ മഹാ രാജ്യത്ത്‌ ന്യൂന പക്ഷങ്ങള്‍‌ക്കും, ഭൂരി പക്ഷങ്ങള്‍‌ക്കും സം‌ഘടിക്കുന്നതിനും പ്രവര്‍‌ത്തിക്കുന്നതിനും സ്വാതന്ത്ര്യമുണ്ട്‌. തങ്ങളുടെ അവകാശ സംരക്ഷണത്തിനു വേണ്ടി ശബ്‌ദിക്കാനും പ്രവര്‍‌ത്തിക്കാനും നിയമ സാധുതയുമുണ്ട്‌.

ഈശ്വര നിരീശ്വര നിര്‍‌മ്മിത രാഷ്‌ട്രീയ രാഷ്‌ട്രീയേതര ദര്‍‌ശനങ്ങളും പ്രത്യയശാസ്‌ത്രങ്ങളും സ്വീകരിക്കാനും പ്രകാശിപ്പിക്കാനും പ്രസരിപ്പിക്കാനും രാജ്യത്തെ നിയമ സം‌ഹിതകള്‍ പൂര്‍‌ണ്ണാനുവാദം നല്‍‌കുന്നുണ്ട്‌.

എന്നാല്‍ നിയമ സം‌വിധാനങ്ങളെ വെല്ലു വിളിക്കാനും,അസഹിഷ്‌ണുതാ പരമായി പ്രവര്‍‌ത്തിക്കാനും,പ്രകോപനങ്ങള്‍ സൃഷ്‌ടിക്കാനും സാമൂഹ്യാവസ്ഥയുടെ സുസ്ഥിരത തകര്‍‌ക്കാനുള്ള ഗൂഢ നീക്കങ്ങള്‍ നടത്താനും ആര്‍‌ക്കും അവകാശമില്ല.അഥവാ മതമുള്ളവനും ഇല്ലാത്തവനും ഒരേ നീതിയാണ്‌ രാജ്യത്തിന്റെ വിഭാവന.

ഇവിടെ നിയമ സംവിധാനങ്ങളുടെ ചട്ടക്കൂട്‌ പൊളിച്ചടക്കാനുള്ള പച്ചയായ നിയമരാഹിത്യ പ്രകടനങ്ങള്‍ പ്രത്യക്ഷമായും പരോക്ഷമായും നടത്തിയതും നടത്തിക്കൊണ്ടിരിക്കുന്നതുമായ നേതൃത്വങ്ങളും സം‌ഘങ്ങളും സം‌ഘടനകളും ഏതാണെന്നത് അറിയാത്തവര്‍ ആരും ഉണ്ടാകുകയില്ല.

കാട്ടു മൃഗങ്ങളെക്കാള്‍ അലമുറയിട്ട്‌ അട്ടഹസിക്കുന്ന രാഷ്‌ട്രീയ അരാഷ്‌ട്രീയ പാര്‍‌ട്ടികളുടെ സ്വൈര്യ വിഹാരം.വെട്ടും തടയും പരസ്‌പര അങ്കക്കുറിക്കലുകളും വാക് പയറ്റും വാള്‍‌ പയറ്റും തുടങ്ങി സം‌സ്‌കാര ഹീനമെന്ന പ്രയോഗത്തിനും അപ്പുറം.അശ്‌ളിലവും അക്രമോത്സുകതയും കൊണ്ട്‌ ആറാടുന്നവര്‍,തീവ്രതയുടെ ഭീകരതയുടെ സകല സീമകള്‍‌ക്കുമപ്പുറം എന്ന പ്രയോഗം പോലും പോരാത്ത ദുരവസ്ഥ.

വര്‍‌ണ്ണ വെറിയുടെ,വം‌ശീയതയുടെ,വര്‍‌ഗീയതയുടെ വിഷം തുപ്പി ഉന്മാദ ദേശീയതയുടെ ചവിട്ടു നാടകം. കാടിളക്കി നാട്ടു മഹാരാജ സിംഹങ്ങളുടെ കഠിനകഠോര ഗര്‍ജ്ജനം.പേടിച്ചരണ്ട പേടമാന്‍ കൂട്ടങ്ങളുടെ കൂട്ട പലായനം.ഒറ്റപ്പെട്ടാല്‍ ചുട്ടു കൊല്ലും. കൂട്ടം കൂടിയാല്‍ ആട്ടിയോടിക്കും. പ്രതിരോധിച്ചാല്‍ പ്രതിപ്പട്ടികയില്‍ ചേര്‍ക്കും.ഗത്യന്തരമില്ലാതെ താങ്ങും തണലുമില്ലാതെ അരക്ഷിതാവസ്ഥയുടെ അക്ഷരാര്‍‌ഥാവസ്ഥയില്‍ അവര്‍‌ണ്ണരും അശരണരും അഗതികളും പട്ടികയില്‍ പെടുന്നവരും പെടാത്തവരും.അധികാര ഗരിമയുടെ രഥോത്സവങ്ങളുടെ അവര്‍‌ണ്ണനീയമായ തേരോട്ടം.

ഇത്തരം സം‌ഘങ്ങളാണത്രെ രാജ്യത്തിന്റെ ശരാശരി നിലപാടില്‍  ജനാധിപത്യ ധാരയിലുള്ളവരും ദേശീയ ബോധമുള്ളവരും മിതവാദികളും.

അത്യുന്നത നിലവാരത്തിലുള്ള ആശയ സം‌വാദം നടത്തുന്നവര്‍. അതിരുവിടാത്ത സമര മുറകള്‍ സ്വീകരിക്കുന്നവര്‍.സാം‌സ്‌കാരികമായ നിലവാരമുള്ള മുദ്രാവാക്യങ്ങള്‍ മുഴക്കുന്നവര്‍.സാന്ത്വനത്തിന്റെ തൂവല്‍ സ്‌പര്‍‌ശവുമായി ജനസേവന മാതൃക കാണിക്കുന്നവര്‍,.സന്നദ്ധ പാതയില്‍ നിതാന്ത ജാഗ്രത പുലര്‍‌ത്തുന്നവര്‍,അടിസ്ഥാന വര്‍‌ഗ്ഗങ്ങള്‍‌ക്ക്‌ വേണ്ടിയും അതിരു വല്‍‌ക്കരിക്കപ്പെട്ടവര്‍‌ക്ക്‌ വേണ്ടിയും ഒച്ച വെക്കുന്നവര്‍,അടിച്ചമര്‍‌ത്തപ്പെടുന്നവരുടെ അവകാശങ്ങള്‍‌ക്ക്‌ വേണ്ടി പോരടിക്കുന്നവര്‍.രാജ്യ താല്‍‌പര്യത്തിനായി എന്തും സഹിക്കാനും ത്യജിക്കാനും മനസ്സാന്നിധ്യമുള്ളവര്‍.ഇവരാണത്രെ കപട രാഷ്‌ട്രീയ നേതൃത്വങ്ങളുടെ വിചാരങ്ങളിലും അവരുടെ ദിശാ സൂചികയുടെ നിഴല്‍ പറ്റിയ  വൃന്ദത്തിന്റെ കാഴ്‌ചപ്പാടുകളിലും തീവ്ര വാദികളും ഭീകരവാദികളും.

രാജ്യ നന്മ എന്നതിലുപരി ലോക നന്മ കാം‌ക്ഷിക്കുന്ന ഈ സം‌ഘത്തിനും അതിന്റെ സഹയാത്രികര്‍‌ക്കും നേരെ കണ്ണുരുട്ടുന്ന കാക്കിക്കുപ്പായക്കാരും അവരുടെ മേലാളന്മാരും ഇവരെയൊക്കെ പറഞ്ഞ്‌ പറഞ്ഞ്‌ വശം‌വദരാക്കിയ കാവിക്കൊടിക്കാരും.ഈ വം‌ശ വെറിയന്മാരുടെ ഈരടികള്‍‌ക്കൊപ്പം ചുവട്‌ വെയ്‌ക്കുന്ന കടുകടുപ്പം നിണ നിറമുള്ള ചെങ്കൊടിക്കാരും!പേരെ പൂരം.

ക്ഷേമ രാഷ്‌ട്ര സങ്കല്‍‌പത്തെ നെഞ്ചേറ്റിയവരും അവരുടെ വിദ്യാര്‍‌ഥി യുവജന വിഭാഗങ്ങളും നിയമപാലകരില്‍ നിന്നും അഭിമുഖീകരിച്ചു കൊണ്ടിരിക്കുന്ന ദൗര്‍‌ഭാഗ്യകരമായ സം‌ഭവ വികാസങ്ങള്‍ അത്യന്തം ഖേദകരമത്രെ.

കാവി ഭീകരതയുടെ ഛായം ചേര്‍‌ന്ന കാക്കി കുപ്പായക്കാരുടെ മുന്‍‌ധാരണകള്‍ ഒരു സമൂഹത്തില്‍ സൃഷ്‌ടിക്കുന്ന അനാരോഗ്യകരമായ നിയമ വാഴ്‌ചയും വീഴ്‌ചയും ഒരു സംസ്‌കൃത സമൂഹത്തിന്റെ പ്രതിഛായക്ക്‌ തന്നെ കളങ്കം ചാര്‍‌ത്തും.

ഇസ്‌ലാം ഓണ്‍‌ലൈവിനു വേണ്ടി

Monday, March 18, 2019

ചിലന്തി

'ദൈവത്തെ കൂടാതുള്ളവരെ രക്ഷകരായി വരിക്കുന്ന ജനമുണ്ടല്ലോ,അവര്‍ ചിലന്തിയെപ്പോലെയാകുന്നു. അതൊരു വീടുണ്ടാക്കി. വീടുകളിലേറ്റം ദുര്‍ബലമായത് ചിലന്തിയുടെ വീടാണല്ലോ. കഷ്ടം! ഇവര്‍ അറിഞ്ഞിരുന്നുവെങ്കില്‍.ഈ ജനം ദൈവത്തെ വെടിഞ്ഞ് പ്രാര്‍ഥിക്കുന്ന എന്തിനെയും ദൈവം നന്നായറിയുന്നുണ്ട്. അവന്‍ അജയ്യനും അഭിജ്ഞനും തന്നെ.ജനങ്ങള്‍ ഉദ്ബുദ്ധരാവുന്നതിനു വേണ്ടിയത്രെ നാം ഈ ഉദാഹരണങ്ങള്‍ വിവരിക്കുന്നത്. പക്ഷേ, ജ്ഞാനമുള്ളവര്‍ മാത്രമേ അവ ഗ്രഹിക്കുന്നുള്ളൂ. ദൈവം ആകാശഭൂമികളെ യാഥാര്‍ഥ്യത്തോടെ സൃഷ്ടിച്ചതാണ്.നിശ്ചയമായും വിശ്വാസികള്‍ക്ക് ഇതിലൊരു ദൃഷ്ടാന്തമുണ്ട്.'

ഖുര്‍‌ആനിലെ ചിലന്തി എന്ന അധ്യായത്തിലെ നാല്‍‌പത്തിയൊന്നാമത്തെ സൂക്ത്മാണിത്.ഈ പ്രപഞ്ചത്തിന്റെ സാക്ഷാല്‍ രക്ഷാധികാരിയെ വെടിയുന്നവനെയാണ്‌ ചിലന്തി എന്ന്‌ ഉപമിച്ചിട്ടുള്ളത്.കൂടാതെ ഏറ്റവും ദുര്‍‌ബലമായ വീട്‌ ചിലന്തിയുടേതാണെന്നും ഖുര്‍‌ആന്‍ വിശദീകരിക്കുന്നു.ഒപ്പം ജ്ഞാനമുള്ളവര്‍‌ക്ക്‌ മാത്രമേ ഈ ഉദാഹരണത്തിന്റെ പൊരുള്‍ ഉള്‍‌കൊള്ളാനാകുകയുള്ളൂ എന്നും വിശ്വാസികള്‍‌ക്ക്‌ ഇതില്‍ ദൃഷ്‌ടാന്തമുണ്ടെന്നും പ്രസ്‌താവിച്ചു കൊണ്ടാണ്‌ ഈ സൂക്തം വിരാമമിടുന്നത്.

പുതിയ പഠന ഗവേഷണങ്ങളില്‍ വ്യക്തമാക്കപ്പെട്ട ചിലന്തിയുടെ നിസ്സഹായാവസ്ഥയും പര്യവസാനവും സാന്ദര്‍‌ഭികമായി മനസ്സിലാക്കി വെയ്‌ക്കുന്നത് ഉചിതമായിരിയ്‌ക്കും.

ചിലന്തികളുടെ കൂടൊരുക്കുന്നത് പെണ്‍ ചിലന്തിയാണത്രെ.അതൊരു വീടുണ്ടാക്കി എന്ന ഖുര്‍‌ആനിക ഭാഷ്യത്തില്‍ സ്‌തീലിം‌ഗം പ്രയോഗിച്ചതിന്റെ കാരണം ഇതാണെന്ന്‌ സുവ്യക്തം.ഖുര്‍‌ആനിലെ ഭാഷാ പരമായ ന്യൂനതയായി ശത്രുക്കള്‍ ചൂണ്ടിക്കാണിച്ചിരുന്ന ഈ പ്രയോഗം എല്ലാ അര്‍‌ഥത്തിലും സുബദ്ധം എന്ന്‌ സാരം.നൂതനമായ ഈ ഗവേഷണ സത്യം ഖുര്‍ആന്‍ വിമര്‍‌ശകരെ അക്ഷരാര്‍‌ഥത്തില്‍ സ്‌തം‌ബ്‌ദരാക്കിയിരിക്കുകയാണ്‌.ഒരു പക്ഷെ പ്രസ്‌തുത ഭാഗം പുല്ലിം‌ഗത്തില്‍ പ്രയോഗിച്ചിരുന്നുവെങ്കില്‍ ഭാഷാ പരമായ ന്യൂനതയാകുമായിരുന്നു എന്നതാണ്‌ യാഥാര്‍‌ഥ്യം.അതെ അവന്‍ അജയ്യനും അഭിജ്ഞനും തന്നെ.

പുതിയ വെളിപ്പെടുത്തലുകള്‍ പ്രകാരം ചിലന്തി കൂടെക്കെ ഒരുക്കി സന്താനങ്ങള്‍ ഉണ്ടായതിന്റെ ശേഷം ആണ്‍ ചിലന്തിയെ പെണ്‍ ചിലന്തി കൊലപ്പെടുത്തും.ചിലന്തിക്കുഞ്ഞുങ്ങള്‍ വളര്‍‌ന്ന്‌ വലുതായാല്‍ അമ്മച്ചിലന്തിയെ മക്കള്‍ എല്ലാവരും ചേര്‍‌ന്ന്‌ വധിച്ചു കളയുകയും ചെയ്യും.വീടുകളില്‍ വെച്ച്‌ ഏറ്റവും ദുര്‍‌ബലമായ വീട്‌ ചിലന്തിയുടേതാണെന്ന പ്രയോഗം മുമ്പെന്നെത്തേക്കാള്‍ അര്‍‌ഥ വ്യാപ്‌തി വര്‍‌ത്തമാന കാലത്തിനുണ്ട്‌.നാള്‍ക്കു നാള്‍ ഖുര്‍‌ആനിന്റെ പ്രസക്തി വര്‍‌ദ്ധിക്കുന്നു എന്നത് തന്നെയായിരിക്കണം വിശുദ്ധ ഗ്രന്ഥത്തിന്റെ ശത്രുക്കള്‍ സര്‍‌വ്വ സന്നാഹങ്ങളോടെ സം‌ഹാര ഭാവം പൂണ്ട്‌ താണ്ഢവമാടുന്നതിന്റെ മുഖ്യ ഹേതു.

ഇസ്‌ലാം ഓണ്‍‌ലൈവിനു വേണ്ടി