Tuesday, April 18, 2017

നിലാവുണ്ടെന്നു കരുതി

സോഷ്യല്‍ മീഡിയയില്‍ ഒഴുകിക്കൊണ്ടിരിക്കുന്ന അറബിക് ചിത്രീകരണത്തിന്റെ സംക്ഷിപ്‌ത തര്‍‌ജ്ജമ പങ്കുവെക്കുന്നു.

ഒരു പട്ടണത്തില്‍ ജന വഞ്ചകനായ ഒരാള്‍ - വര്‍‌ത്തമാന മലയാള ശൈലിയില്‍ പറഞ്ഞാല്‍ ആള്‍ ദൈവം ബുദ്ധി ശൂന്യരായ ജനങ്ങളെ കബളിപ്പിച്ചു കൊണ്ടിരുന്നു.തന്റെ നേരും നെറിയും കെട്ട കച്ചവട സാമ്രാജ്യം വളര്‍ന്നു പന്തലിച്ചു.ഒരു ദിവസം സ്വാതികനായ ഒരു ശൈഖ്‌ അതു വഴി വന്നു.ജനങ്ങള്‍ ബഹളം വെക്കുന്നതിന്റെയും  വട്ടം കൂടി നില്‍‌ക്കുന്നതിന്റെയും പൊരുള്‍ അന്വേഷിച്ചപ്പോള്‍ ശൈഖ്‌ സ്‌തബ്‌ദനായി.

അയാള്‍ സ്വര്‍‌ഗ്ഗ രാജ്യത്തെ ഭൂമി ആവശ്യക്കാര്‍ക്ക് വില്‍‌പന നടത്തുകയാണ്‌ പോലും.ഇത്തരം കുത്സിത ശ്രമങ്ങളെ ബുദ്ധി പൂര്‍‌വ്വം കൈകാര്യം ചെയ്യാനുള്ള തീരുമാനത്തില്‍ തന്ത്രജ്ഞനായ ശൈഖ്‌ പ്രസ്‌തുത ആള്‍ ദൈവത്തെ സമീപിച്ചു.ഒരു തുണ്ട്‌ സ്വര്‍‌ഗ്ഗ ഭൂമിക്ക് 100 ദിനാര്‍ വില പറഞ്ഞു.ഇതു കേട്ട ശൈഖ്‌ അയാളോട്‌ നരകത്തിലെ ഭൂമിയുടെ വില അന്വേഷിച്ചു.നരകത്തിലെ ഭൂമിക്ക്‌ വിലയൊന്നും തരേണ്ടതില്ലെന്ന്‌ ആള്‍ ദൈവം പ്രതികരിച്ചു.അതു വേണ്ട വില തരാന്‍ തയ്യാറാണെന്നു സമര്‍ഥനായ ശൈഖ്‌ മറുപടി നല്‍‌കി.എന്നാല്‍ കാല്‍ ഭാഗം നരകവും താങ്കള്‍ എടുത്തു കൊള്ളൂക.100 ദിനാര്‍ മതി.അങ്ങനെയാണെങ്കില്‍ 400 ദിനാര്‍ തരാം നരകം മുഴുവന്‍ തന്നേക്കുക.എന്ന ശൈഖിന്റെ അഭിപ്രായം അം‌ഗീകരിക്കപ്പെട്ടു.കച്ചവടം ഉറപ്പിച്ചു.സാക്ഷി പത്രവും വാങ്ങി.സ്വര്‍‌ഗം മാത്രമല്ല നരകവും വാങ്ങാന്‍ ആളെ കിട്ടുന്നു എന്ന സന്തോഷം ആള്‍‌ദൈവത്തെ വല്ലാതെ ആഹ്‌ളാദ ഭരിതനാക്കി.

ഇതിനു ശേഷം ജനങ്ങളോടായി സ്വാതികനായ ശൈഖ്‌ വിളിച്ചു പറഞ്ഞു.സഹോദരങ്ങളേ.. നിങ്ങളാരും വല്ലാതെ ഓടിക്കിതക്കേണ്ട കാര്യമില്ല.നരക ലോകം പൂര്‍‌ണ്ണമായും ഈ മൊത്തക്കച്ചവടക്കാരന്‍ എനിക്ക്‌ തീറെഴുതി തന്നിരിക്കുന്നു.അതിനാല്‍ ഇനി ഈ മനുഷ്യനില്‍ നിന്നും സ്വര്‍‌ഗ്ഗ ഭൂമി വാങ്ങിയാലും ഇല്ലങ്കിലും നിങ്ങള്‍ ഭയപ്പെടേണ്ടതില്ല.

നിലാവുണ്ടെന്നു കരുതി വെളുക്കുവോളം മോഷ്‌ടിക്കാം എന്നത്‌ വിഢിത്തം എന്നാണല്ലോ പ്രമാണം.

0 comments:

Post a Comment

Note: Only a member of this blog may post a comment.