Sunday, November 20, 2022

ഉറക്കം നഷ്‌ടപ്പെടുത്തിയ ഖത്തറിന്റെ സ്വപ്‌‌നങ്ങള്‍..

നാല്‌ ദശാബ്‌‌ദങ്ങളായി ഖത്തറിനെ കണ്ട് കൊണ്ടിരിക്കുകയാണ്‌.ഇത്രയൊന്നും പുരോഗമിച്ചിട്ടില്ലാത്ത എമ്പതുകളിലും കാല് പന്ത് ജ്വരമുള്ള ഒരു തലമുറ വളര്‌ന്നു വരുന്ന വിസില് വിളി കേള്‌ക്കാമായിരുന്നു.കാല് പന്തുകളിയുടെ ആവേശം പ്രകടിപ്പിക്കുകയും പ്രസരിപ്പിക്കുകയും ചെയ്യുന്ന ഓഡിയോകള് ഉച്ചത്തില് പ്ലേ ചെയ്‌ത് വാഹനങ്ങളില് വിലസുന്ന ചെറുപ്പക്കാരെ അത്ഭുതത്തോടെ നോക്കി നിന്നിട്ടുണ്ട്‌.

ഖത്തര് വിനോദ സഞ്ചാര ഭൂപടത്തില് തിളങ്ങി നില്‌ക്കുന്ന സൂഖ് വാഖിഫ് സന്ധ്യാ പ്രാര്‌ഥനാ സമയത്തോടെ നിരപ്പലകകള് വിരിക്കുന്ന കാലമുണ്ടായിരുന്നു .ഖത്തറിന്റെ ഹൃദയമായിമാറിയ മുശേരിബില് പ്രസിദ്ധമായിരുന്ന അബ്‌‌ദുല്ലാ ബിന് ഥാനി ശാരാ കഹ്‌റബ തുടങ്ങിയ ഇടങ്ങളിലെ സ്ഥാപനങ്ങള് രാത്രി ഒമ്പത് മണിയോടെയായിരുന്നു അടച്ചിരുന്നത്.പ്രസ്‌‌തുത വീഥികളിലെ കാസറ്റ് കടകളും വീഡിയൊ ലൈബ്രറികളും ഒറ്റപ്പെട്ട ചില ചായക്കടകളും 10 മണിവരെയൊക്കെ പ്രവര്‌ത്തിച്ചിരുന്നു.
അക്കാലവും കാലഘട്ടവും കഴിഞ്ഞു.പുലരുവോളം സജീവമായ മഹാ നഗരിയായി ദോഹ മാറിയിരിക്കുന്നു.
------------
ഖത്തറിലെ ജനവാസ കേന്ദ്രങ്ങളില് പെട്ട പ്രദേശമാണ്‌ റുമൈല.ഇപ്പോള് അത്യാകര്‌ഷകമായി ഒരുക്കിയെടുത്ത ബിദ പാര്‌ക്കിന്റെ എതിര് വശം. പഴയ കാല ജനവാസത്തെ ഓര്‌മ്മിപ്പിക്കുന്ന പള്ളി പുനര്‌ നിര്മ്മിപ്പിക്കപ്പെട്ടിട്ടുണ്ട്.
ചിര പുരാതന പഴമ അതേ പടി നിലനിര്‌ത്തികൊണ്ട്‌ തന്നെയാണ്‌ പള്ളി പുനരുദ്ധരിച്ചിരിക്കുന്നത്.പള്ളിയുടെ ചുറ്റുപാടുമുണ്ടായിരുന്ന വാസ സ്ഥലം മരങ്ങളും ചെടികളും തൊടികളും താഴ്‌വരകളും ഒക്കെയാക്കി പരിവര്‌ത്തിപ്പിച്ചിരിക്കുന്നു.
രണ്ടോ മൂന്നോ ഗ്രോസറി കടകളും,സ്റ്റേഷനറി കടകളും പച്ചക്കറിപ്പീടികകളും, ചായക്കടകളും,പഴയ ഒരു ലൈബ്രറിയും,ഇലക്‌ട്രിക് ഷോപ്പും,ബാര്‌ബര് ഷാപ്പുകളും ഒരു പട്ടാണി റൊട്ടി ബാക്കറിയുമായിരുന്നു റുമൈല തെരുവിലെ പ്രധാന കച്ചവട സ്ഥാപനങ്ങള്.കൂടാതെ പള്ളിയോട്‌ ചേര്‌ന്ന്‌ ഒരു മലയാളി ഉപ്പാപ്പാടെ ജൂസ്‌ പീടികയും, അതിഥി മന്ദിരത്തിന്റെ പിന്‌ഭാഗത്തുണ്ടായിരുന്ന ദാല് റൊട്ടിക്ക്‌ പ്രസിദ്ധമായ ഡല്‌ഹി ദര്‌ബാര് എന്ന റസ്‌റ്റോറന്റും കൂടെ ആയാല് പഴയ റുമൈലയുടെ പ്രൗഢമായ മുഖം ഏകദേശം പൂര്‌ണ്ണം.
മുശേരിബ്‌ അക്ഷരാര്‌ഥത്തില് ദോഹയുടെ ഹൃദയമാണ്‌.സൂഖ് വാഖിഫ്; സ്വദേശികളും വിദേശികളുമായ സന്ദര്‌ശകരുടെ ബാഹുല്യം കൊണ്ട് വീര്‌പ്പുമുട്ടുന്ന അതിമനോഹരമായ വിനോദ സഞ്ചാര മേഖലായി മാറിയിരിക്കുന്നു.കോര്‌ണീഷിനോട് ചേര്‌ന്നു കിടക്കുന്ന ബിദയിലാകട്ടെ ആരവങ്ങളടങ്ങുന്നില്ല.ആരുടെയും കണ്ണും കാതും ഹൃദയവും കവരുന്ന വിസ്‌മയ കാഴ്‌‌ചകളുടെ ഭൂമികയായി പരിവര്‌ത്തിക്കപ്പെട്ടിരിക്കുന്നു.
ലോക കാല് പന്തുത്സവവുമായി ബന്ധപ്പെട്ട പ്രധാന കേന്ദ്രങ്ങളില് ഒന്നാണ്‌ അല് ബിദ.
ഈ പന്തുത്സവത്തിന്റെ ആരവവും വലകിലുങ്ങുന്നതും വിസില് മുഴങ്ങുന്നതും കാതോര്‌ത്ത് ഈ പച്ചപ്പിലിരിക്കുമ്പോള് ഗതകാല ചരിത്രങ്ങളുടെ എന്തൊക്കെ ശേഷിപ്പുകളാണെന്നോ സ്‌ക്രീനിലെന്നപോലെ തെളിയുന്നത്.
ഇന്ന്‌ ലോകം മൂഴുവന് വിരല് തുമ്പില് കറങ്ങുന്ന സാങ്കേതിക വിദ്യകളുടെ അത്ഭുത ലോകത്തിരുന്ന് തിരിഞ്ഞു നോക്കുമ്പോള് സ്വപ്‌നത്തില് പോലും സങ്കല്‌പ്പിച്ചിട്ടില്ലാത്ത നാളുകളിലാണെന്നു സമ്മതിച്ചു പോകും.
നാഴികകള് മാത്രം മതി അത്യാധിനിക സജ്ജീകരണങ്ങളോടെ ഒരുക്കിയ അല് ബൈത് സ്റ്റേഡിയത്തില് വിസില് മുഴങ്ങാന്.
വിവിധ ദേശ ഭാഷക്കാരുടെ സം‌ഗീതമഴ വര്‌ഷിക്കുകയാണ്‌.പൊതു സ്ഥലങ്ങളും വഴിയോരങ്ങളും വാഹനങ്ങളും വര്‌ണ്ണാഭമായി അലങ്കരിക്കപ്പെട്ടിരിക്കുന്നു.കടലോരങ്ങളിലെ ജലധാരകള് നൃത്തച്ചുവടുകള് വെച്ച് മനം മയക്കുകയാണ്‌.ഗായക സംഘങ്ങളുടെ താളമേളങ്ങളില് ആരാധകര് തിമര്‌ത്താടുകയാണ്‌.
അഭിമാനകരമായ മുഹൂര്‌ത്തങ്ങള്‌ക്ക്‌ സാക്ഷ്യം വഹിച്ചു കൊണ്ട് ശാന്തമായി പറക്കുന്ന കടുംചുവപ്പ് അന്നാബി പതാക പാറിപ്പറക്കുമ്പോള് ഈ മനോഹരമായ രാജ്യത്തിന്റെ സാരഥ്യത്തെ എത്ര കീര്‌ത്തിച്ചാലും മതിയാകുകയില്ല.ലോക കാല്പന്തുത്സവ പ്രഖ്യാപനം മുതല് ഇന്നോളം ഖത്തര് അഭിമുഖീകരിക്കേണ്ടി വന്ന പ്രതികൂല സാഹചര്യങ്ങളും പ്രതിബന്ധങ്ങളും വിവരണാതീതമത്രെ.സകല പ്രതിസന്ധികളെയും പുതിയ സാധ്യതകളാക്കി ഉറക്കം നഷ്‌ടപ്പെടുത്തി കെട്ടിപ്പൊക്കിയ തങ്ങളുടെ സ്വപ്‌നങ്ങളുടെ പളുങ്കുകൊട്ടാരം സാക്ഷാത്കരിക്കപ്പെടുമ്പോള് കണ്ണുകള് അറിയാതെ സന്തോഷാശ്രുക്കള് പൊഴിക്കുന്നുണ്ട്.
ഖത്തറിന്റെ അഭിമാന മുഹൂര്‌ത്തത്തിനു ജയഹേ..ജയഹേ .ജയഹേ..
=======
മഞ്ഞിയില്‍

Sunday, November 6, 2022

തനിമരത്തണലില്‍

വര്‍‌ണ്ണങ്ങളിലെ വൈവിധ്യങ്ങളെ വൈരുദ്ധ്യങ്ങളായി വായിക്കാന്‍  ബോധപൂര്‍‌വ്വമായ പ്രേരണകള്‍ നടന്നു കൊണ്ടിരിക്കുന്ന കാലത്ത്, വൈവിധ്യങ്ങള്‍ ആസ്വദിക്കാനും ആസ്വദിപ്പിക്കാനും സര്‍‌ഗാത്മകമായി ഇടപെടല്‍ നടത്തിക്കൊണ്ടിരിക്കുക എന്നതാണ്‌ തനിമ കലാ സാഹിത്യവേദിയുടെ ദൗത്യം.തനിമ ഡയറക‌ടര്‍ ആര്‍.എസ് അബ്‌‌ദുല്‍ ജലീല്‍ പറഞ്ഞു.തനിമ കലാസാഹിത്യവേദിയുടെ അനുബന്ധമായി രൂപം കൊണ്ട തനിമ ലിറ്റററി ക്ലബ്ബ്‌ തനിമരത്തണലില്‍ എന്ന തലക്കെട്ടില്‍ സം‌ഘടിപ്പിച്ച സം‌ഗമത്തില്‍ ആമുഖ ഭാഷണം നടത്തുകയയിരുന്നു ആര്‍.എസ്.

തനിമ സം‌ഘടിപ്പിച്ച വിവിധ മത്സരങ്ങള്‍ വഴി രജിസ്‌‌റ്റര്‍ ചെയ്യപ്പെട്ടവരാണ്‌ ലിറ്റററി ക്ലബ്ബിലെ അം‌ഗങ്ങള്‍.തങ്ങളുടെ അഭിരുചികളെ ദിനേന പങ്കുവെക്കുകയും പ്രോത്സാഹിപ്പിക്കുകയും ചെയ്യുന്ന വാട്‌‌സാപ്പ്‌ ഗ്രൂപ്പ്‌ തനിമ ലിറ്റററി ഗ്രൂപ്പായി രൂപാന്തരപ്പെടുകയായിരുന്നു.അക്ഷര സ്നേഹികളുടെ വിപുലമായ ഒരു കൂട്ടായ്‌മയായി ഈ കൂട്ടായ്‌‌മയെ വളര്‍‌ത്തി കൊണ്ടുവരാനുള്ള ശ്രമങ്ങള്‍ ഉണ്ടാകണമെന്ന് സദസ്സില്‍ പങ്കുവെക്കപ്പെട്ടു.   

ഓള്‍ഡ് ഐഡിയല്‍ സ്‌‌കുള്‍ ഹാളില്‍ സം‌ഘടിപ്പിച്ച കലാമേള കണ്ണും കാതും കുളിര്‍‌പ്പിക്കുന കാട്ടരുവി പോലെ കളകളം ഒഴുകുകയായിരുന്നു.ഐഷ റനയുടെ പ്രാര്‍‌ഥനാ ഗീതത്തോടെയായിരുന്നു പ്രാരം‌ഭം.മുപ്പതിലേറെ പ്രതിഭകളുടെ പ്രകടനങ്ങള്‍‌ കാഴ്‌‌ചവെച്ച കലാവിരുന്ന്‌ കലാസ്വാദകരുടെ സാന്നിധ്യം കൊണ്ട്‌ ധന്യമായി.

ക്ലബ്ബ്‌ അം‌ഗങ്ങള്‍‌ക്കും കുടും‌ബാം‌ഗങ്ങള്‍‌ക്കും മാത്രമായി സം‌ഘടിപ്പിച്ച സം‌ഗമത്തില്‍ സീനിയര്‍ ജൂനിയര്‍ കുട്ടികള്‍‌ക്കായി കളറിങ് മത്സരം സം‌ഘടിപ്പിച്ചിരുന്നു.സീനിയര്‍ വിഭാഗത്തില്‍ ഹയ ഫൈസല്‍,മുഹമ്മദ് നഫിന്‍‌ഷ,മറിയം അബ്‌ദുല്‍ വഹാബ്‌ എന്നീ പ്രതിഭകള്‍ യഥാക്രമം ഒന്നും രണ്ടും മൂന്നും സ്ഥാനത്തിന്‌ അര്‍‌ഹരായി.ജൂനിയര്‍ വിഭാഗത്തില്‍ ധ്യാന്‍ ഷിജു,സാറ അബ്‌‌ദുല്‍ വഹാബ്,ഐദിൻ ഷിസാൻ തുടങ്ങിയ പിഞ്ചോമനകളും യഥാക്രമം സമ്മാനാര്‍‌ഹരായി.

ശ്രുതിമധുരമായ ഗാനങ്ങളും,ഘനഗം‌ഭീര ശബ്‌ദത്തില്‍ മുഴങ്ങിയ കവിതകളും,പ്രേക്ഷകരുടെ കണ്ണു നനയിച്ച സോളോ ഡ്രാമയും,പ്രബുദ്ധത പറയുന്ന മലയാളികള്‍ വീണു കൊണ്ടേയിരിക്കുന്ന ചതിക്കുഴികളിലേയ്‌ക്ക്‌ വിരല്‍ ചൂണ്ടിയ സ്‌കിറ്റും എല്ലാം ഒത്തു ചേര്‍‌ന്നപ്പോള്‍ ദീര്‍‌ഘകാലത്തെ മുന്നൊരുക്കങ്ങളോടെ നടത്തിയ കലാവിരുന്നിന്‌ അസീസ് മഞ്ഞിയില്‍ സമാപനം കുറിച്ചു.നബീല്‍ പുത്തൂര്‍ നിയന്ത്രിച്ചു. 

ആദ്യാന്തം രസച്ചരട്‌ പൊട്ടാതെ വര്‍‌ണ്ണങ്ങളുടെ മഴവില്ല്‌ തീര്‍‌ത്ത പരിപാടികള്‍ക്ക്‌ ആര്‍.എസ് അബ്‌‌ദുല്‍ ജലീല്‍, അസീസ് മഞ്ഞിയില്‍,ജയന്‍ മടിക്കൈ,ബിനു ജോണ്‍,മുത്തു ഐ.സി.ആര്‍.സി,യൂസുഫ് പുലാപറ്റ,നാസര്‍ വേളം,നബീല്‍ പുത്തൂര്‍,അമല്‍ ഫെര്‍‌മിസ്,റഹീന സമദ്,നബില റിയാസ് എന്നിവര്‍ നേതൃത്വം നല്‍‌കി. 

==========

തനിമരത്തണലില്‍

കലാവിരുന്നൊരുക്കിയവര്‍

----------------

ഷിജു ആര്‍ കാനായി (കവിത)

അബ്‌‌ദുല്‍ ലത്വീഫ് ഗുരുവായൂര്‍ (സോളോ ഡ്രാമ)

ഷാജിറ ഷിഹാബുദ്ദീന്‍ (ഗാനം)

ഫൈസല്‍ അബൂബക്കര്‍ (കവിത)

ഹഖീം പി (ഗാനം)

യൂസുഫ് പുലാപറ്റ (കവിത)

അമല്‍ ഫെര്‍‌മിസ് (അനുഭവം)

ഹയാ ഫൈസല്‍ (ഗാനം)

ജാസ്‌മിന്‍ ഫൈസല്‍

മഹ്‌‌ബൂബ് ഖാന്‍ (ഗാനം)

സുരയ്യ സാദിഖ് (കവിത)

വിമല്‍ വാസുദേവ് (കവിത)

ജയന്‍ മടിക്കൈ (കവിത)

അലി കളത്തിങ്കല്‍ (ഗാനം)

ജലീല്‍ കരുവന്നൂര്‍  (ഗാനം)

ബിനു ജോണ്‍

കൃഷണ ദാസ് 

സജ്‌‌നി മുസ്‌‌തഫ

സന്തോഷ്

-------

മുത്തു ഐ.സി.ആര്‍.സി &ടീം

മുഹമ്മദ് ഫാസില്‍

ഷാഹിന്‍ പെരുമ്പിലാവ്

അബീദ്

ജ‌അ്‌ഫര്‍ സാദിഖ്

------

ഷാജിറ & ടീം

സലീന ഹുസ്സൈന്‍

നബില റിയാസ്

ആദില

റഹീന സമദ്

നജ്‌‌മുന്നിസ

ജാസ്‌‌മിന്‍ ഫൈസല്‍

===========





Wednesday, March 30, 2022

റമദാന്‍ പച്ചമനുഷ്യനെ വാര്‍‌ത്തെടുക്കുന്ന കാലം

മഹാമാരിയുടെ അഗ്നി പരീക്ഷണങ്ങളില്‍ നിന്നും ഘട്ടം ഘട്ടമായി മോചനം കിട്ടിക്കൊണ്ടിരിക്കുന്ന സാഹചര്യത്തില്‍ പുണ്യങ്ങളുടെ പൂക്കാലം വീണ്ടും സമാഗതമാകുകയാണ്‌.പഠിപ്പിക്കപ്പെട്ട പഞ്ചകര്‍‌മ്മങ്ങളിലെ എല്ലാ അനുഷ്‌‌ഠാനങ്ങളുടെയും ആത്മാവ്‌ ഉള്‍‌കൊള്ളുന്ന റമദാന്‍ വിശ്വാസികളുടെ മനസ്സുകളില്‍ സൃഷ്‌ടിക്കുന്ന വര്‍‌ണ്ണരാചികള്‍ വിവരണാതീതം.പ്രഥമമായി അനുശാസിക്കപ്പെട്ട സത്യസാക്ഷ്യത്തിന്റെ പ്രയോഗ വല്‍‌കരണത്തിന്‌ അനുയോജ്യമായ മണ്ണും വെള്ളവും വളവും ലഭിക്കുന്ന കൃഷിയിറക്കല്‍ കാലവും,നന്മയുടെ കൊയ്‌‌തുകാലവും കൂടെയാണിത്. പ്രാര്‍‌ഥനാ നിര്‍‌ഭരമായ മനസ്സോട്‌ കൂടെ ഈ പുണ്യമാസത്തിലേക്ക് പ്രവേശിച്ച് ഒരു മഹദ്‌ ദൗത്യത്തിന്‌ കച്ചമുറുക്കിയിറങ്ങാന്‍,ലക്ഷ്യസ്ഥാനത്തേക്ക്‌ കാടും മേടും കുന്നും താഴ്‌‌വരകളും താണ്ടി പരന്നൊഴുകാന്‍ പരുവപ്പെട്ടവനായി വിശ്വാസി മാറും.

പ്രതിജ്ഞാബദ്ധനായ വിശ്വാസി   അതീവ ജാഗ്രതയിലാണ്‌.അല്ലാഹുവിന്റെ മുന്നില്‍ അഞ്ചു നേരവും അണിനിരന്ന്‌ സകല തിന്മകളോടുമുള്ള പോരാട്ടത്തിനുള്ള തയ്യാറെടുപ്പിന്‌ ശേഷമാണ്‌  സമൂഹത്തില്‍ വ്യാപൃതനാകുന്നത്.പഞ്ചേന്ദ്രിയങ്ങളെ വരുതിയില്‍ നിര്‍‌ത്താനുള്ള ജാഗ്രവത്തായ നാളുകള്‍,ദാനധര്‍‌മ്മങ്ങള്‍ കവിഞ്ഞൊഴുകാനുള്ള പ്രചോദനങ്ങള്‍, ക്ഷമയും സഹനവും കനിവും പാരമ്യതയിലെത്തുന്ന സന്ദര്‍‌ഭങ്ങള്‍ അവനില്‍ രൂപപ്പെടുത്തുന്ന മാനവിക മാനുഷിക ഭാവങ്ങള്‍ ഒരു സം‌സ്‌കൃത സമൂഹ സങ്കല്‍‌പങ്ങളുടെ മാനത്ത് മഴവില്ലുകള്‍ തീര്‍‌ക്കും.

അവധി നിശ്ചയിക്കപ്പെട്ട സമൂഹത്തില്‍ അവന്റെ സാന്നിധ്യവും സ്വാധീനവും ഫലപ്രദമായി നടക്കണം.റമദാനില്‍ നേടിയെടുക്കുന്ന ശിക്ഷണങ്ങള്‍ പാഴായിപ്പോകാതിരിക്കാനുള്ള സൂക്ഷ്‌‌മത ഈ വസന്തത്തില്‍ തന്നെ തുടങ്ങിവെക്കണം.

നിര്‍‌ണ്ണിതമായ അവധിയെത്തിയാല്‍ അണുമണി വ്യത്യാസമില്ലാതെ വിധി നടപ്പിലാക്കപ്പെടുന്ന സമൂഹത്തോടുള്ള ബാധ്യത ഓരോ നോമ്പുകാരന്റെയും മനസ്സിനെ മഥിച്ചു കൊണ്ടിരിക്കണം. 

ഒരു വിശ്വാസിയെ എല്ലാ അര്‍‌ഥത്തിലും സമൂഹത്തിന്‌ അനുഭവിക്കാനുള്ള അവസരങ്ങള്‍ ജനിപ്പിക്കുക എന്നതാണ്‌ സത്യസാക്ഷ്യത്തിന്റെ മറ്റൊരു വായന.ഇതു തന്നെയാണ്‌ ഓരോ വിശ്വാസിയുടെയും ഒഴിച്ചുകൂടാനാകാത്ത ദൗത്യവും.

ഈ മഹദ്‌ ദൗത്യ നിര്‍‌വഹണത്തിനുതകുന്ന ഒരു പച്ച മനുഷ്യനെ വാര്‍‌ത്തെടുക്കുകയാണ്‌ റമദാനിലെ രാപ്പകലുകള്‍.

ഫാഷിസവും നവ ലിബറലിസവും നിരീശ്വര നിര്‍‌മ്മിത പ്രത്യയ ശാസ്‌ത്രങ്ങളും  കോപ്പുകൂട്ടി വമിപ്പിക്കുന്ന  പുകച്ചുരുളുകളാല്‍ അന്ധകാരാവൃതമായ ലോകത്ത് ഒരു മിന്നാമിനുങ്ങെങ്കിലുമാകാനുള്ള പ്രയത്നം വിശ്വാസിയെ സം‌ബന്ധിച്ച് നിര്‍‌ബന്ധ ബാധ്യതയത്രെ.ഈ കൂരാ കൂരിരുട്ടില്‍ വെളിച്ചത്തിന്‌ നല്ല പ്രസക്തിയുണ്ട്‌.ദുര്‍‌ഗന്ധ ഭൂമികയില്‍ സുഗന്ധത്തിനും.

---------

وَلِكُلِّ أُمَّةٍ أَجَلٌۖ فَإِذَا جَاءَ أَجَلُهُمْ لَا يَسْتَأْخِرُونَ سَاعَةًۖ وَلَا يَسْتَقْدِمُونَ ﴿٣٤﴾ يَا بَنِي آدَمَ إِمَّا يَأْتِيَنَّكُمْ رُسُلٌ مِّنكُمْ يَقُصُّونَ عَلَيْكُمْ آيَاتِيۙ فَمَنِ اتَّقَىٰ وَأَصْلَحَ فَلَا خَوْفٌ عَلَيْهِمْ وَلَا هُمْ يَحْزَنُونَ  

എല്ലാ ജനങ്ങള്‍ക്കും ഒരു നിശ്ചിത അവധിയുണ്ട്.ഒരു ജനത്തിന്റെ അവധിയെത്തിയാല്‍ പിന്നെ ഒരു നിമിഷം പോലും അവര്‍ മുന്തുകയോ പിന്തുകയോ ചെയ്യുന്നതല്ല.അല്ലയോ ആദം സന്തതികളേ, ഓര്‍മിച്ചു കൊള്ളുവിന്‍! നിങ്ങളുടെ അടുക്കല്‍ എന്റെ ദൃഷ്ടാന്തങ്ങള്‍ വിശദീകരിച്ച്‌ കൊണ്ട്‌ നിങ്ങളില്‍ നിന്നു തന്നെയുള്ള ദൂതന്മാര്‍ ആഗതരായാല്‍, അപ്പോള്‍ അനുസരണക്കേട് വെടിഞ്ഞ് തന്റെ നടപടികള്‍ സംസ്‌കരിക്കുന്നതാരോ, അവന്‍ ഭയപ്പെടാനും ദുഃഖിക്കാനും സംഗതിയാകുന്നതല്ല.(അ‌അ്‌റാഫ് 34...)

ഓരോ സമുദായത്തിന്റെയും നിര്‍‌ണ്ണിതമായ കാലം ഓര്‍‌മ്മിപ്പിക്കുന്നതിലൂടെ ഒരോ പ്രബോധകന്റെയും ദൗത്യം കൂടെ അടിവരയിടപ്പെടുന്നുണ്ട്‌.കാരണം ധാര്‍‌മ്മികതയുടെ പരിധി ലം‌ഘിക്കപ്പെടുന്നതിലൂടെയാണ്‌ ഒരോ സമുദായവും നിഷ്‌കാസനം ചെയ്യപ്പെടുന്നതിനുള്ള കാലഗണന എന്നാണ്‌ പണ്ഡിത മതം.ഒരു സമൂഹത്തിന്റെ കാലാവധി നിര്‍‌ണ്ണയിക്കപ്പെടുന്നതിന്റെ മാനദണ്ഡം പ്രസ്‌തുത സമൂഹത്തിലെ ധര്‍‌മ്മാധര്‍‌മ്മങ്ങളുടെ താളം തെറ്റലാണ്‌ അഥവാ മൂല്യച്യുതിയാണ്‌.ഉപര്യുക്ത സൂക്തത്തിന്റെ പ്രാമാണികമായ വിശദീകരണത്തിന്റെ അടിസ്ഥാനത്തില്‍,നന്മയുടെ പ്രസാരണവും തിന്മയുടെ തിരസ്‌കാരവും ഓരോ വിശ്വാസിയുടെയും നിര്‍‌ബന്ധ ബാധ്യതയാണെന്ന വീക്ഷണത്തെ സാധൂകരിക്കാന്‍ കഴിയും.ദൈവത്തിന്റെ പ്രതിനിധിയാണെന്ന പാഠം ഉള്‍‌ക്കൊള്ളുന്നവര്‍‌ക്ക്‌ ഈ കാര്യങ്ങള്‍ എളുപ്പത്തില്‍ ഗ്രഹിക്കാന്‍ സാധിച്ചേക്കും.

ദൈവ ദൃഷ്‌ടാന്തങ്ങള്‍ വിശദീകരിച്ച് കൊണ്ട്‌ പ്രവാചകന്മാര്‍ ആഗതരാകുന്നതും അതിനെ സ്വീകരിക്കുക വഴി മാത്രമാണ്‌ ആദം സന്തതികളുടെ ശാശ്വതമായ വിജയം എന്നും തുടര്‍‌ന്ന്‌ പറയുന്നു.ആദ്യ പിതാവ്‌ മുതല്‍ അന്ത്യ പ്രവാചകന്‍ വരെയുള്ള കണ്ണി മുറിയാത്ത ശൃംഖല ഇവിടെ ഓര്‍‌മ്മിപ്പിക്കപ്പെടുന്നു.

അല്ലയോ ആദം സന്തതികളേ, ഓര്‍മിച്ചു കൊള്ളുവിന്‍! നിങ്ങളുടെ അടുക്കല്‍ എന്റെ ദൃഷ്ടാന്തങ്ങള്‍ വിശദീകരിച്ച്‌ കൊണ്ട്‌ നിങ്ങളില്‍ നിന്നു തന്നെയുള്ള ദൂതന്മാര്‍ ആഗതരായാല്‍'  يَا بَنِي آدَمَ إِمَّا يَأْتِيَنَّكُمْ رُسُلٌ مِّنكُمْ يَقُصُّونَ عَلَيْكُمْ آيَاتِيۙ എന്ന ഖുര്‍‌ആനിക ഭാഷാ പ്രയോഗം ഏറെ അര്‍‌ഥ സമ്പന്നമാണ്‌.

സത്യ സന്ധവും വസ്‌തു നിഷ്‌ടവും ചരിത്ര പ്രാധാന്യമുള്ളതുമായ ശുദ്ധമായ പാരമ്പര്യമുള്ള കഥാ കഥനത്തിന്റെ മഹത്വവും പ്രവാചകന്മാരുടെ പ്രബോധനത്തില്‍ ഊന്നിയ തൗഹീദ്, രിസാലത്ത്, ആഖിറത്ത് എന്നീ മൂല്യത്രയങ്ങളും ഈ പ്രയോഗത്തില്‍ നിഴലിക്കുന്നുണ്ട്‌.

സ്വര്‍‌ഗലോകത്ത് നിന്നും ഭൂമിയിലേക്ക്‌ അയക്കപ്പെട്ട മനുഷ്യന്‍ യഥാര്‍‌ഥ തറവാട്ടിലേക്ക്‌ തിരിച്ചു ചെല്ലാന്‍ ലക്ഷ്യം വെച്ച്‌ ഈ ഭൂമിയിലെ പരീക്ഷണങ്ങളെ നേരിടണം.പ്രവാചകന്മാരുടെ കാല ശേഷം തന്നില്‍ അര്‍‌പ്പിതമായ പ്രബോധന ദൗത്യം കര്‍‌മ്മം കൊണ്ടും ധര്‍‌മ്മം കൊണ്ടും നിര്‍‌വഹിക്കണം.യഥാര്‍‌ഥ പ്രബോധന ദൗത്യം നിര്‍‌വഹിക്കാന്‍ കണ്ണിമുറിയാത്ത പ്രവാച പാഠപഠന കഥകളില്‍ കൃത്യമായ അവബോധമുണ്ടായിരിക്കണം.എങ്കില്‍ മാത്രമേ സമയാസമയങ്ങളില്‍ പ്രവാചകന്മാര്‍ വിശദീകരിച്ചതു പോലെ വശ്യമായ ഭാഷയിലും ശൈലിയിലും  ദൗത്യം നിര്‍‌വഹിക്കാന്‍ സാധിക്കുകയുള്ളൂ.

ഓരോ സമൂഹത്തിനും എളുപ്പത്തില്‍ ഗ്രഹിക്കാന്‍ കഴിയും വിധത്തിലായിരുന്നു പ്രവാചകനമാര്‍ നിയോഗിക്കപ്പെട്ടത്.

وَمَا أَرْسَلْنَا مِن رَّسُولٍ إِلَّا بِلِسَانِ قَوْمِهِ لِيُبَيِّنَ لَهُمْۖ فَيُضِلُّ اللَّهُ مَن يَشَاءُ وَيَهْدِي مَن يَشَاءُۚ وَهُوَ الْعَزِيزُ الْحَكِيمُ 

'നാം മനുഷ്യര്‍ക്ക് സന്ദേശം നല്‍കുന്നതിനായി അയച്ച ഏതു ദൈവദൂതനും സ്വജനത്തിന്റെ ഭാഷയില്‍ത്തന്നെയാണ് അവരോട് സംസാരിച്ചിട്ടുള്ളത്. അദ്ദേഹം അവരെ കാര്യങ്ങള്‍ സുവ്യക്തമായി ഗ്രഹിപ്പിക്കേണ്ടതിനാണിത്'(ഇബ്രാഹീം 4 )  

 പ്രബോധനം ഒരു ആചാര രീതിയൊ ചടങ്ങൊ അല്ല.പ്രബോധകന്റെ ഭാഷയും ആകര്‍‌ഷകമായ ശൈലിയും കഥാ കഥനങ്ങള്‍‌‌ക്ക്‌ പ്രാപ്‌തമായ ചരിത്രാവബോധവും വിജ്ഞാനവും  എല്ലാം ഒരു ലക്ഷ്യ ബോധമുള്ള ഉത്തരവാദിത്ത ബോധമുള്ള പ്രബോധകനില്‍ ഉണ്ടായിരിക്കണം.തന്റെ ദൗത്യ നിര്‍‌വഹണത്തിന്‌ കളമൊരുക്കാന്‍ സന്നദ്ധമായ വ്യവസ്ഥാപിതമായ ഒരു കണ്ണിയില്‍ പ്രബോധകന്‍ അണി ചേരുക എന്നതും കാലത്തിന്റെ തേട്ടമത്രെ.

വിശ്വാസിയുടെ ഉത്തരവാദിത്ത നിര്‍‌വഹണത്തെ കുറിച്ചുള്ള ഓര്‍‌മ്മപ്പെടുത്തലുകള്‍‌ക്കൊപ്പം പുറം തിരിഞ്ഞു നില്‍‌ക്കുന്ന അന്ധരും ബധിരരും മൂകരുമായ ഒരു സമൂഹത്തെ കുറിച്ചും ഖുര്‍‌ആന്‍ പറഞ്ഞു തരുന്നുണ്ട്‌.

 أَمْ تَحْسَبُ أَنَّ أَكْثَرَهُمْ يَسْمَعُونَ أَوْ يَعْقِلُونَۚ إِنْ هُمْ إِلَّا كَالْأَنْعَامِۖ بَلْ هُمْ أَضَلُّ سَبِيلً

അവരിലധികമാളുകളും കേള്‍ക്കുകയും ഗ്രഹിക്കുകയും ചെയ്യുന്നുണ്ടെന്ന് കരുതുന്നുവോ? അവരോ, വെറും കാലികളെപ്പോലെയാകുന്നു. അല്ല; അവയെക്കാളേറെ വഴിതെറ്റിയവരാകുന്നു.(ഫുര്‍‌ഖാന്‍ 44) എന്ന ഖുര്‍‌ആനിക നിരീക്ഷണത്തെ ഗൗരവ പൂര്‍‌വ്വം വായിച്ച് മണ്ണിനോടും മനുഷ്യനോടുമുള്ള വിശ്വാസിയുടെ പ്രതിബദ്ധതയെ ഓര്‍‌ത്തു കൊണ്ടും ഓര്‍‌മ്മിപ്പിച്ചു കൊണ്ടും സദാ ജാഗ്രതയിലാകേണ്ടവരത്രെ പ്രബോധകര്‍.

വ്രത വിശുദ്ധിയുടെ ദിനരാത്രങ്ങള്‍ സജീവമാക്കി പുതിയ മനുഷ്യനായി ജനിക്കാന്‍ ഈ സം‌സ്‌‌ക്കരണകാലം പ്രയോജനപ്പെടുമാറാകട്ടെ.

Friday, March 25, 2022

ചെകുത്താന്മാര്‍‌ക്കും കടലിന്നുമിടയില്‍ ഒരു സമൂഹം

പ്രവാചക പ്രഭു ഒരു മരത്തണലില്‍ വിശ്രമിക്കുകയായിരുന്നു.അതു വഴി എത്തിയ ജൂതന്‍ തിരുമേനിയുടെ അരയില്‍ നിന്നും ആയുധം ഊരിയെടുത്ത് കൊണ്ട്‌ ചോദിച്ചു.ആരാണ്‌ ഈ അവസരത്തില്‍ താങ്കളെ രക്ഷിക്കാനുള്ളത്..? "അല്ലാഹു.." നിസ്സങ്കോചം പ്രവാചകന്‍ പ്രതികരിച്ചു.പ്രവാചകന്റെ പ്രത്യുത്തരത്തില്‍ ചകിതനായ ശത്രുവിന്റെ കയ്യില്‍ നിന്നും ആയുധം ഊര്‍‌ന്നു വീണു. ആയുധം വീണ്ടെടുത്ത് തിരുമേനി തിരിച്ചൊന്ന്‌  ചോദിച്ചപ്പോള്‍ പേടിച്ചരണ്ടു പോയ ശത്രുവിനെക്കുറിച്ച് ചരിത്രത്തില്‍ വായിച്ചു പോയിട്ടുണ്ട്‌.ഇത് നൂറ്റാണ്ടുകള്‍‌ക്ക്‌ മുമ്പുള്ള കഥ.എന്നാല്‍ ആധുനിക കാലത്തും ഇത്തരം മുഹൂര്‍‌ത്തങ്ങള്‍ ജനിക്കുന്നുണ്ട്‌. ഇനിയും ജനിച്ചു കൊണ്ടേയിരിയ്‌ക്കും.

കലാലയമുറ്റത്തേക്ക്‌ കടന്നു വന്ന ഒരു യുവതിയെ ഫാഷിസ്‌റ്റ് കാപാലിക വൃന്ദം കലാപക്കൊടിയുമായി വളഞ്ഞു നിന്ന സാഹചര്യം വളരെ സ്വാഭാവികമായി അല്ലാഹു അക്‌ബര്‍ എന്നു പ്രഘോഷിച്ചപ്പോള്‍,ഫാഷിസ്റ്റ് ഭാഷയിലെ പുലിക്കുട്ടികള്‍ പൂച്ചക്കുട്ടികളെപ്പോലെ ചമ്മിപ്പോയതിന്‌ ലോക മാധ്യമങ്ങള്‍ സാക്ഷി.

വര്‍‌ത്തമാന കാലത്ത് ഈ പ്രതികരണം അതിലെ തക്‌ബീര്‍ മുഴക്കം, അടിച്ചമര്‍‌ത്തപ്പെടുന്നവരുടെ വിമോചന മന്ത്രമായി രൂപാന്തരം പ്രാപിച്ചു എന്നതാണ്‌ യാഥാര്‍‌ഥ്യം. അല്ലാഹുവിനെ മാത്രം സാഷ്‌‌ടാം‌ഗം നമിക്കുന്നവര്‍‌ക്ക്‌ മാറ്റാരുടെ മുന്നിലും തലകുനിക്കേണ്ടതില്ല.ഒരു ശക്തിയെ മാത്രം ഭയപ്പെട്ട്‌ ജീവിക്കുന്നവര്‍.മറ്റാരെയും ഭയപ്പെടേണ്ടതുമില്ല എന്ന ലളിതമായ സത്യം ഇവിടെ പ്രകാശിച്ച് നില്‍‌ക്കുന്നുണ്ട്‌.വിശ്വാസികള്‍ പ്രത്യേകിച്ചും ഈ പരമാര്‍‌ഥം പഠിക്കാതെ പോകരുത്.അല്ലാഹുവാണ്‌ അത്യുന്നതന്‍ എന്ന്‌ പ്രഖ്യാപിക്കുന്നതിലൂടെ മറ്റെല്ലാം അപ്രസക്തമാകും.ഈ പ്രഘോഷണം ഏതെങ്കിലും ഒരു വിഭാഗത്തിന്റെ കുലദൈവത്തെ കുറിച്ചല്ല മറിച്ച് ലോകത്തിന്റെ സാക്ഷാല്‍ ദൈവത്തെക്കുറിച്ചാണെന്ന്‌ മനസ്സിലാക്കി കൊടുക്കാന്‍ വിശ്വാസികള്‍‌ക്ക്‌ സാധിക്കണം.

ഈ പശ്ചാത്തലത്തില്‍ സ്വാര്‍‌ഥം‌ഭരികളായ 'ദേശീയമുസ്‌ലിം പ്രായോജകര്‍‌' ആരാഞ്ഞ്‌ കൊണ്ടിരിക്കുന്നത്  ഒരുവിശ്വാസിനി ആത്മരക്ഷാര്‍‌ഥം തക്‌ബീര്‍ മുഴക്കിയതിലെ കര്‍‌മ്മശാസ്‌ത്ര വിധി എന്തായിരിക്കും എന്നതാണ്‌.ഇതു തന്നെയായിരിക്കാം വര്‍‌ത്തമാന വിശ്വാസിലോകം നേരിടുന്ന വലിയ വെല്ലുവിളികളില്‍ അതിസങ്കീര്‍‌ണ്ണവും സങ്കടകരവുമായ കാര്യവും.

നേതാകളെക്കാള്‍ പക്വതയുള്ള അനുയായികള്‍ വളര്‍‌ന്നു കൊണ്ടിരിക്കുന്ന ഇക്കാലത്ത് ഇത്തരം പൊയ്‌വെടികളും പൊയ്‌മുഖങ്ങളും ചരിത്രത്തിന്റെ ചവറ്റുകൊട്ടകള്‍ പോലും ഏറ്റുവാങ്ങാത്ത കാലം വിദൂരമല്ല.

അധികാര രാഷ്‌ട്രീയത്തിന്റെ താല്‍‌ക്കാലികതകളില്‍ മേയുന്ന മസില്‍ പ്രഭുക്കന്മാരായ കപട വിപ്‌ളവ സാധുക്കള്‍ ഈ ബുദ്ധിയുടെ ദര്‍‌ശനത്തിന്റെ മുന്നില്‍ അന്ധരാണ്‌ - ബധിരരാണ്‌ - ഹൃദയം കെട്ടവരാണ്‌. ആശയ ദാരിദ്ര്യത്തിന്റെ പടുകുഴിയില്‍ പെട്ട്‌ നട്ടം തിരിയുന്ന ഗതികെട്ട ഇക്കൂട്ടരോട്‌ പറയുന്നതും പറയാതിരിക്കുന്നതും സമമാണ്‌.നമുക്ക്‌ വായിക്കാനാഹ്വാനം ചെയ്യാം ഒപ്പം തൂലികക്ക്‌ മൂര്‍‌ച്ച കൂട്ടികൊണ്ടേയിരിയ്‌ക്കാം.

ഇസ്‌‌ലാമിക പ്രസ്ഥാനത്തിന്റെ മാതൃകാ പരമായ സേവന സാന്ത്വന ശിക്ഷണ സ്ഥാപനങ്ങളും ആരാധനാലയങ്ങളും പഠനമനന വൈജ്ഞാനിക കേന്ദ്രങ്ങളും രാജ്യത്തെ സാം‌സ്‌ക്കാരിക പരിസരത്തെ ഉണര്‍‌ത്തുന്നതിലും വളര്‍‌ത്തുന്നതിലും ഉത്തേജിപ്പിക്കുന്നതിലും അതി സര്‍‌ഗാത്മകമായ പങ്കുവഹിക്കുന്നുണ്ട്‌.

വിശ്വാസികള്‍‌ക്കും അവിശ്വാസികള്‍‌ക്കും നിഷേധികള്‍‌ക്കും നിരീശ്വരവാദികള്‍‌ക്കും എല്ലാം പഠിക്കാനും മനസ്സിലാക്കാനും സാധിക്കും വിധം ഇസ്‌‌ലാമിക ദര്‍‌ശനത്തെ പൂര്‍‌ണ്ണാര്‍‌ഥത്തില്‍ പ്രസരിപ്പിക്കുന്നതിലും പ്രായോഗികമായി പ്രതിഫലിപ്പിക്കുന്നതിലും പ്രസ്ഥാനം ഇനിയും ബഹുദൂരം കഠിനാധ്വാനം ചെയ്യേണ്ടി വരും.

പ്രബുദ്ധമായ ചിന്താ സരണിയിലൂടെ ആരോഗ്യമുള്ള മനസ്സും മസ്‌തിഷ്‌‌കവുമുള്ള അതിലുപരി മാനവിക മാനുഷികതയെ താലോലിക്കുന്ന സമാധാനത്തിന്റെ പാലകരും സേവകരുമായ ഒരു മാതൃകാ സമൂഹത്തെ വാര്‍‌ത്തെടുക്കുക എന്ന ഇസ്‌‌ലാമികമായ കാഴ്‌‌ചപ്പാട്‌ പോലും തിരിയാത്ത അത്യാധുനിക മുല്ലമാര്‍ വിശ്വാസി സമൂഹത്തില്‍ ഏല്‍‌പിക്കുന്ന പരിക്കുകള്‍ പരിഹരിക്കുന്നതിലും കൂടുതല്‍ ജാഗ്രത പുലര്‍‌ത്തേണ്ട കാലത്തേക്കാണ്‌ നാം സഞ്ചരിച്ചു കൊണ്ടിരിക്കുന്നത്.

രാജ്യദ്രോഹപരമായ പ്രവര്‍‌ത്തനങ്ങള്‍ നടത്തിക്കൊണ്ടിരിക്കുകയും,ആരും  രാജ്യ സ്‌നേഹം പഠിപ്പിക്കേണ്ടതില്ല എന്ന്‌ ശാഠ്യം പിടിക്കുകയും ചെയ്യുന്ന ഫാഷിസം ഒരു വശത്ത് ! ജനാധിപത്യ വിരുദ്ധ നടപടികളും അക്രമ രാഷ്‌ട്രീയവും പൊടിപൊടിപ്പിക്കുകയും,എന്നാല്‍ ആരും ജനാധിപത്യം പഠിപ്പിക്കേണ്ട എന്ന്‌ ആവര്‍‌ത്തിക്കുകയും ചെയ്യുന്ന ചുടു ചോരക്കൊടിയുടമകള്‍ മറ്റൊരു വശത്ത് ! അരാജകത്വ പ്രവണതകളിലേയ്‌ക്കുള്ള രണ്ട്‌ പക്ഷങ്ങള്‍.ഈ ഇരട്ടകളോട്‌ സമദൂരം പ്രാപിച്ച് കണ്ണടച്ചിരുട്ടാക്കുന്ന മേലാപ്പും മേലങ്കിയുമണിഞ്ഞവര്‍ മറ്റൊരു വശത്തും.ഇവിടെ ചെകുത്താന്മാര്‍‌ക്കും കടലിന്നുമിടയിലാണ്‌ വിശ്വാസി സമൂഹം.

ഉന്നത നിലവാരത്തിലുള്ള ആശയ സം‌വാദം നടത്തുന്നവര്‍. അതിരുവിടാത്ത സമര മുറകള്‍ സ്വീകരിക്കുന്നവര്‍,സാം‌സ്‌കാരികമായ നിലവാരമുള്ള മുദ്രാവാക്യങ്ങള്‍ മുഴക്കുന്നവര്‍,സാന്ത്വനത്തിന്റെ തൂവല്‍ സ്‌പര്‍‌ശവുമായി ജനസേവന മാതൃക കാണിക്കുന്നവര്‍,സന്നദ്ധ പാതയില്‍ നിതാന്ത ജാഗ്രത പുലര്‍‌ത്തുന്നവര്‍,അടിസ്ഥാന വര്‍‌ഗ്ഗങ്ങള്‍‌ക്ക്‌ വേണ്ടിയും അതിരു വല്‍‌ക്കരിക്കപ്പെട്ടവര്‍‌ക്ക്‌ വേണ്ടിയും ഒച്ച വെക്കുന്നവര്‍, അടിച്ചമര്‍‌ത്തപ്പെടുന്നവരുടെ അവകാശങ്ങള്‍‌ക്ക്‌ വേണ്ടി നിരന്തരം പോരടിക്കുന്നവര്‍,രാജ്യ താല്‍‌പര്യത്തിനായി എന്തും സഹിക്കാനും ത്യജിക്കാനും മനസ്സാന്നിധ്യമുള്ളവര്‍.ഇവരാണത്രെ കപട രാഷ്‌ട്രീയ നേതൃത്വങ്ങളുടെ വിചാരങ്ങളിലും അവരുടെ ദിശാ സൂചികയുടെ നിഴല്‍ പറ്റിയ പൗരോഹിത്യ  വൃന്ദത്തിന്റെ കാഴ്‌ചപ്പാടുകളിലും ജനാധിപത്യവിരുദ്ധരും തീവ്ര വാദികളും ഭീകരവാദികളും. സമര്‍‌ഥരായ മോഷ്‌ടാക്കള്‍ മോഷ്‌ടിക്കപ്പെട്ടവരെ നോക്കി കൂകി വിളിച്ച്‌ രക്ഷപ്പെടും പോലെ.
---------------
അസീസ് മഞ്ഞിയില്‍

Monday, August 30, 2021

പ്രതിരോധ ചിന്തകള്‍

ആരോഗ്യവും ആരോഗ്യകരമായ സമീപനങ്ങൾ പോലും നഷ്‌‌ടപ്പെടുന്ന കാലത്ത് ചില ആയുർവേദ ആരോഗ്യ പ്രതിരോധ ചിന്തകൾ പ്രകാശിപ്പിക്കുന്നു.ആയുർവേദ കുടുംബത്തിലെ കാരണവർ പാരമ്പര്യ ആയുർവേദ ഭിഷഗ്വരൻ മുഈനുദ്ദീൻ വൈദ്യർ പങ്കിട്ട അറിവുകളും ഇതര പാരമ്പര്യ വിജ്ഞാന ശാഖകളുമാണ് ഈ വിശദികരണത്തിന്‌ ആധാരം.

വര്‍‌ത്തമാന കാലത്ത്‌ പൊട്ടിപ്പുറപ്പെട്ട കൊറോണ തുടങ്ങിയ രോഗാണു ബാധയെ ചെറുക്കാനുള്ള പ്രതിരോധത്തെ കുറിച്ചാണ്‌ പറയുന്നത്‌ പ്രതിവിധിയെ കുറിച്ചല്ല.

വിവിധങ്ങളായ രോഗാണു ബാധകള്‍ വര്‍ത്തമാന കാലത്ത്‌ ജന ജീവിതം പോലും സ്‌തം‌ഭിപ്പിക്കും വിധം ഭീതിതമാണ്‌.ഇത്തരം മാരകവും അപൂര്‍‌വ്വമുമായ അണുബാധകള്‍‌ക്കെതിരെ ക്ലിപ്‌തവും വ്യക്തവുമായ പ്രതിവിധികള്‍ പൂര്‍‌ണ്ണമായ രീതിയില്‍ വികസിപ്പിച്ചെടുക്കാന്‍ ആധുനിക ശാസ്‌ത്ര ലോകത്തിന്‌ സാധിച്ചിട്ടില്ല എന്നത്‌ യാഥാര്‍‌ഥ്യമാണ്‌.പരമ്പരാഗത ആയുര്‍‌വേദ ശാസ്‌ത്രങ്ങളിലായാലും ഇതര വൈദ്യ ശാസ്‌ത്രങ്ങളിലായാലും ഇതു തന്നെയാണ്‌ സ്ഥിതി.

ഭക്ഷ്യ വിഷാംശങ്ങള്‍ക്കെതിരായും ബാക്‌ടീരയകളെ പ്രതിരോധിക്കാനും  (ഹരിദ്ര) മഞ്ഞളിന്‌ കഴിഞ്ഞേക്കും.ഭക്ഷണത്തിലെ വിഷാംശങ്ങളെ നിര്‍വീര്യമാക്കി ശരീരത്തെ സംരക്ഷിക്കുന്നതില്‍ മഞ്ഞള്‍ മുഖ്യ പങ്ക് വഹിക്കുന്നുണ്ട്‌.

ഓരോ രാജ്യത്തേയും പരമ്പരാഗത ഭക്ഷണ ക്രമങ്ങള്‍ പരിശോധിച്ചാല്‍ അതിലൊക്കെ അതതു പ്രദേശത്തുകാരുടെ ആരോഗ്യ പ്രതിരോധത്തെ ത്വരിതപ്പെടുത്താനും ശക്തിപ്പെടുത്താനും ഉതകുന്ന ഘടകങ്ങള്‍ അടങ്ങിയിട്ടുണ്ടെന്നു കാണാം.രാജ്യത്തെ ഔഷധ വീര്യമുള്ള തേനും  സുഗന്ധ വ്യഞ്‌‌ജനങ്ങളും ആരോഗ്യ സം‌രക്ഷണത്തില്‍ വഹിക്കുന്ന പങ്ക്‌ വിലപ്പെട്ടതത്രെ.

ഹരിദ്ര ഒരു സുഗന്ധ വ്യഞ്‌ജനമാണ് ഇഞ്ചി വര്‍ഗ്ഗത്തില്‍പെട്ട ഹരിദ്ര അഥവാ മഞ്ഞൾ.ഇത് ഒരു പ്രധാന ആയുർവേദ സസ്യമാണ്. ശ്വാസകോശ സംബന്ധമായ അണു ബാധകൾ,വീക്കം,മുറിവുകൾ എന്നിവയ്‌ക്ക്‌ മഞ്ഞള്‍ ഫല പ്രദമായി ഉപയോഗിച്ചു വരുന്നു.ഇതില്‍ അടങ്ങിയിട്ടുള്ള കുര്‍ക്കുമിണ്‍ എന്ന പദാര്‍ഥത്തിന് മാരകമായ രോഗാണുക്കളെ പ്രതിരോധിക്കാന്‍ കഴിവുണ്ട്. വളരെ വൈകിയാണ് മഞ്ഞളിന്റെ പ്രതിരോധ ശേഷി ആധുനിക ശാസ്‌‌ത്രം തിരിച്ചറിഞ്ഞത്.

മഞ്ഞളിലടങ്ങിയിരിക്കുന്ന കുര്‍ക്കുമിന്‍ രോഗ പ്രതിരോധ ശക്തി വര്‍ദ്ധിപ്പിക്കും.രോഗാണുക്കളുണ്ടാക്കുന്ന വിഷാംശങ്ങളെ നിര്‍ വീര്യമാക്കാന്‍ സഹായിക്കും. വീട്ടില്‍ തന്നെ പൊടിച്ചെടുത്ത മഞ്ഞള്‍പൊടി കറികളില്‍ ചേര്‍ക്കുകയോ, കാല്‍ ഗ്‌ളാസ്സ്‌ വെളളത്തില്‍ ഒരു ടീസ്‌‌പൂണ്‍  ദിവസത്തിലൊരു നേരമെങ്കിലും കഴിക്കുകയൊ ചെയ്‌താല്‍ ഒരു പരിധിവരെ രോഗാണുക്കള്‍ നിര്‍വീര്യമാകും.ഇഞ്ചിനീരും ചെറുനാരങ്ങാ നീരും സമം ചേര്‍ത്ത് ആഹാരത്തിന് ശേഷം രണ്ട് ടേബിള്‍ സ്‌‌പൂണ്‍ വീതം കഴിക്കുന്നതും ഗുണം ചെയ്യും.മഞ്ഞള്‍, ചുക്ക് എന്നിവ ചേര്‍ത്തുണ്ടാക്കിയ രജന്യാദി ചൂര്‍ണ്ണം, ഹരിദ്രഖണ്ഡം എന്നിവയും അശ്വഗന്ധ ചൂര്‍ണ്ണം, ത്രിഫല ചൂര്‍ണ്ണം തുടങ്ങിയ ഔഷധങ്ങളും ഫലപ്രദമാണ്‌.

ബാക്‌ടീരിയ വളര്‍ച്ചയെ തടയുന്നതിനും അവയുണ്ടാക്കുന്ന വിഷാംശങ്ങളെ നിര്‍വീര്യമാക്കുന്നതിനും വിറ്റാമിന്‍ 'സി'ക്ക് കഴിയും. നെല്ലിക്കയില്‍ വിറ്റാമിന്‍ 'സി' ധാരാളമുണ്ട്.നെല്ലിക്കാ നീര് വെളളവും ചേര്‍ത്ത് ഭക്ഷണത്തിന്റെ കൂടെ കഴിക്കുന്നതും  പ്രതിരോധത്തിന് സഹായകമാണ്. അതു പോലെ പോഷകങ്ങളുടെ കലവറയാണ് ചെറുതേന്‍.അനവധി രോഗങ്ങള്‍ക്കുള്ള പ്രതിവിധിയും പ്രതിരോധവുമാണ്‌. ആരോഗ്യ സംരക്ഷണത്തിനും രോഗ പ്രതിരോധത്തിനും അത്യുത്തമമത്രെ.

ലോകമെമ്പാടും വികസിത രാജ്യങ്ങളില്‍ പോലും അതി ശീഘ്രം പടര്‍‌ന്നു കൊണ്ടിരിക്കുന്ന കോവിഡ്‌ രോഗാണുക്കള്‍ പ്രാരം‌ഭ ഘട്ടത്തില്‍ നമ്മുടെ രാജ്യത്ത്‌ താരതമ്യേന കുറവായിരുന്നു.അതിന്റെ പ്രധാന കാരണങ്ങള്‍, രാജ്യത്തെ കാലാവസ്ഥയും പൂര്‍‌ണ്ണമായും അസ്‌തമിച്ചിട്ടില്ലാത്ത നമ്മുടെ ഭക്ഷണ ക്രമവും, ഒപ്പം കേന്ദ്ര സം‌സ്‌ഥാന ആരോഗ്യ മന്ത്രാലയങ്ങളുടെ സമയോചിതമായ ക്രമീകരണങ്ങളുമാണെന്നു വിലയിരുത്തപ്പെട്ടിരുന്നു. എന്നാല്‍ അമിത വിശ്വാസവും അശാസ്‌ത്രീയമായ ഉദ്യോഗസ്ഥ മേധാവിത്വ നിയന്ത്രണങ്ങളുടെ കെട്ടു കാഴ്‌ചകളും,ജനങ്ങളിലുണ്ടാക്കിയ നീരസവും അതൃ‌പ്‌തിയും എല്ലാം തകിടം മറിക്കുകയായിരുന്നു.

മാരകമായ  രോഗാണു ബാധയുടെ അതിപ്രസര കാലത്ത് പരമ്പരാഗത പ്രതിരോധ ഘടകങ്ങളും സം‌വിധാനങ്ങളും അടുത്തറിയാനും ഫലപ്രദമായി ഉപയോഗപ്പെടുത്താനും നമുക്ക്‌ സാധികണം.ശുചിത്വം വാക്കുകളില്‍ ഒതുങ്ങാതെയും ഒതുക്കാതെയും കണിശമായി പാലികുന്നതില്‍ നിര്‍‌ബന്ധബുദ്ധി ഉണ്ടാവേണ്ടതും കാലഘട്ടത്തിന്റെ തേട്ടമത്രെ.

അസീസ്‌ മഞ്ഞിയില്‍

സ്രോതസ്സ്‌:-
(1) മുഈനുദ്ദീന്‍ വൈദ്യര്‍ തൊയക്കാവ്‌
(2) പാരമ്പര്യ ആയുര്‍‌വേദ വിധികള്‍


Monday, July 5, 2021

ആസ്വദിച്ചു തീരാത്ത ബാല്യകാലസഖി

ബഷീര്‍ കൃതികളുടെ ആസ്വാദനം എന്നതിനെക്കാള്‍ ബഷീര്‍ എന്ന ഇമ്മിണിബല്യേ ഒന്നിനെ തന്നെയാണ്‌ യഥാര്‍‌ഥത്തില്‍ ആസ്വദിക്കേണ്ടത്. ബഷീറിന്റെ ബാല്യകാല സഖി ഓരോ വായനക്കരന്റെയും സഖിയാണ്‌.കാളിദാസൻ മരിച്ചു, കണ്വമാമുനി മരിച്ചു,അനസൂയ മരിച്ചു,പ്രിയംവദ മരിച്ചു,ശകുന്തള മാത്രം മരിച്ചില്ല എന്ന വയലാറിന്റെ വരികളിലെ കാല്‍‌പനികത പോലെയാണ്‌ ബഷീര്‍ കഥാപാത്രങ്ങളുടെ കഥയും.

എഴുത്തുകാരനും,ചുറ്റും കൂടിയവരും, വിമര്‍‌ശകരും, ആസ്വാദകരും ഒക്കെ മരിച്ചു പോയിരിക്കുന്നു.പക്ഷെ ബഷീറിന്റെ കഥാപാത്രങ്ങള്‍ ആരും തന്നെ മരിച്ചിട്ടില്ല-മരിക്കുകയും ഇല്ല.

ഭാഷാ പ്രയോഗങ്ങളിലെ വ്യാകരണ ധര്‍‌മ്മങ്ങളെക്കാള്‍ തന്റെ വിഭാവനയിലെ കഥാ തന്തുവിലെ മര്‍‌മ്മങ്ങളായിരുന്നു ബഷീറിന്‌ പഥ്യം.അക്ഷരങ്ങള്‍‌ക്കും അതിന്റെ സ്വര ഭേദങ്ങള്‍‌ക്കും അതിലൂടെ വിരിയുന്ന ആശയങ്ങള്‍‌ക്കും ആസ്വാദനങ്ങള്‍‌ക്കും ചിട്ടപ്പെടുത്തപ്പെട്ട കൃത്രിമ നിയമ സം‌ഹിതയില്‍ ബഷീര്‍ വിശ്വസിച്ചിരുന്നില്ല. ഭാഷാ വ്യാകരണ മുറകളുടെ കെട്ടുകാഴ്‌ചകളുടെ അതിരുകളില്‍ ഭാവനയെ ഒതുക്കുകയായിരുന്നില്ല.മറിച്ച്‌ തനിക്ക്‌ ചുറ്റുമുള്ള കാഴ്‌ചകള്‍ അനുഭവിച്ചറിഞ്ഞ പരിവേഷത്തോടെ അപ്പടി പകര്‍‌ത്തുക എന്നതായിരുന്നു ബഷീര്‍ എന്ന മഹാനായ എഴുത്തുകാരന്റെ ശീലും ശൈലിയും.

സങ്കല്‍‌പങ്ങള്‍‌ക്ക്‌ വേണ്ടി - തത്വ ജ്ഞാനങ്ങള്‍‌ക്ക്‌ വേണ്ടി ഒന്നും ഈ നിസ്വാര്‍‌ഥനായ എഴുത്തുകാരന്‍  പ്രയാസപ്പെടുന്നില്ല.‌അകൃത്രിമങ്ങളായ ജിവിതാനുഭവങ്ങളുടെ ഏറ്റവും പച്ചയായ ഭാവമാണ് പ്രതീക്ഷയാണ്‌‌ അദ്ദേഹത്തിന്റെ കാല്‍‌പനികതകളുടെ ലോകം.പൊതു നിരീക്ഷണത്തില്‍ വിവരമില്ലായ്‌മയില്‍ നിന്നെന്നപോലെ നിര്‍ഗളിക്കാവുന്ന സ്വാഭാവികതകളാണ്‌ ബഷീറിന്റെ ദാര്‍‌ശനികതകളുടെ ലോകം.

ഒന്നും ഒന്നും കൂട്ടിയാല്‍ ഇമ്മിണി ബല്യേ ഒന്ന്‌ എന്നത്‌ കണക്ക് അറിയാത്ത മജീദിന്റെ നിഷ്‌കളങ്കതയെയാണ്‌ സൂചിപ്പിക്കുന്നത്.ഒപ്പം കണക്ക്‌ അറിയുന്നവര്‍‌ക്ക്‌ പുതിയ ഒരു ദാര്‍‌ശനിക പാഠവും.എന്നാല്‍ വിജ്ഞാനത്തിന്റെ കുത്തകക്കാര്‍‌ ഇതൊന്നും വകവെച്ചു നല്‍‌കിക്കൊള്ളണമെന്നില്ല.

രണ്ട്‌ പുഴകള്‍ സം‌ഗമിച്ച് വീണ്ടും ഒന്നായി ഒഴുകുന്നതില്‍ നിന്ന്‌ മജീദ്‌ ഉള്‍‌കൊള്ളുന്ന ബല്യേ ഒന്ന്‌ എന്ന യാഥര്‍‌ഥ്യവും ഒന്നും ഒന്നും കൂട്ടിയാല്‍ രണ്ട്‌ എന്ന ഗണിത ശാസ്‌ത്ര അക്ഷരാര്‍‌ഥ വിവരവും പരസ്‌പരം കലഹിക്കേണ്ട ഒരു സമസ്യയല്ല.ബല്യേ ഒന്ന്‌ എന്നത്‌ പച്ചയായ യാഥാര്‍‌ഥ്യമാണ്‌.രണ്ട്‌ എന്നത്‌ ഭൗതിക ജീവിത സാഹചര്യത്തിന്റെ പരുക്കന്‍ യാഥാര്‍ഥ്യവും‌. ജീവിതായോധനത്തിന്‌  ഈ പരുക്കന്‍ യാഥാര്‍ഥ്യം വേണ്ടി വരും.എന്നാല്‍ ജിവിതം ഏറെ ഹൃദ്യമായി ആസ്വദിക്കാന്‍ പച്ചയായ യാഥാര്‍‌ഥ്യത്തെ ഉള്‍കൊണ്ടവര്‍‌ക്കേ സാധിക്കുകയുള്ളൂ..

ഉല്‍‌കൃഷ്‌ടവും അല്ലാത്തതും എന്നതിന്‌ പാശ്ചാത്യ പൗരസ്ത്യ‌ വര്‍‌ണ്ണാടിസ്ഥാനങ്ങളില്‍ തീരുമാനിക്കപ്പെടുന്ന അലിഖിത നിയമങ്ങളെ കടപുഴക്കി വീഴ്‌ത്തുന്നതില്‍ നൈപുണ്യമുള്ള മാന്ത്രികനാണ് വൈക്കം മുഹമ്മദ്‌ ബഷീര്‍‌‌.സമൂഹത്തില്‍ വേരോട്ടമുള്ള തിന്മകളുടെ പടര്‍‌പ്പുല്ലുകളെ പിഴുതെറിയാന്‍ കെല്‍പുള്ള സര്‍‌ഗാത്മക തൂലിക കൊണ്ട് മലയാളത്തെ ശുദ്ധീകരിക്കാനും സമ്പന്നമാക്കാനും അശ്രാന്തം പരിശ്രമിച്ച സുല്‍‌ത്താനാണ്‌ ബഷീര്‍.

ജീവിത ഗന്ധിയായ തന്റെ ഇതര കൃതികളെപ്പോലെ മഹത്തരമാണ്‌  ബാല്യകാല സഖിയുടെ ഇതിവൃത്തം.ഇമ്മിണി ബല്യേ ഒന്ന്‌ എന്ന സ്വാഭാവിക ദാര്‍‌ശനികതയെ‌ പ്രതിഷ്‌ഠിച്ചു വെച്ച‌ പച്ച മനുഷ്യരുടെ ലോകവും.

സിനമാ താരം ശ്രീ മമ്മുട്ടി ബഷീറിനെ കുറിച്ച് പറഞ്ഞത് ഒരിക്കല്‍ കൂടെ അടിവരയിട്ടു കൊണ്ട്‌ ചുരുക്കട്ടെ.ഫിലോസഫിയെ സാധാരണക്കാരന്റെ ഭാഷയില്‍ പറഞ്ഞ എഴുത്തുകാരനാണ്‌ വൈക്കം മുഹമ്മദ് ബഷീര്‍.